കോട്ടയം: കേരളത്തില് വര്ദ്ധിച്ചു വരുന്ന ഭൂമി കയ്യേറ്റങ്ങളും അനധികൃത കെട്ടിട നിര്മ്മാണങ്ങളും ഉടനടി നിര്ത്തിവയ്ക്കണമെന്ന് ബിജെപി സംസ്ഥാന വൈസ് പ്രസിഡന്റ് പി.എം. വേലായുധന് ആവശ്യപ്പെട്ടു. ബിജെപി കോട്ടയം സമ്പൂര്ണ്ണ ജില്ലാ കമ്മറ്റി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
വാഗമണ് മലനിരകളില് ഉള്പ്പെട്ട കോലാഹലമേട്, തങ്ങളുപ്പാറ, വാകച്ചുവട് പ്രദേശങ്ങളിലെ അനധികൃത കയ്യേറ്റങ്ങളും കെട്ടിട നിര്മ്മാണങ്ങളും നിര്ത്തിവയ്ക്കണമെന്ന് പ്രമേയത്തിലൂടെ ജില്ലാ കമ്മറ്റി ആവശ്യപ്പെട്ടു. പൂഞ്ഞാര് നിയോജകമണ്ഡലം കമ്മറ്റിയുടെ നേതൃത്വത്തില് ഇന്ന് വാഗമണ് മലനിരകളിലേ ബഹുജനമാര്ച്ച് സംഘടിപ്പിക്കും. സംസ്ഥാന ജനറല് സെക്രട്ടറി എം.ടി. രമേശ് ഉത്ഘാടനം ചെയ്യും.
ബിജെപി ജില്ലാ പ്രസിഡന്റ് എന്. ഹരി അദ്ധ്യക്ഷത വഹിച്ച യോഗത്തില് സംസ്ഥാന സംഘടനാ സെക്രട്ടറി എല്. ഗണേശ്, സംസ്ഥാന വ്യക്താവ് അഡ്വ. എസ്. ജയസൂര്യന്, മധ്യമേഖലാ പ്രസിഡന്റ് അഡ്വ. എന്.കെ. നാരായണന് നമ്പൂതിരി, കര്ഷകമോര്ച്ച സംസ്ഥാന പ്രസിഡന്റ് പി.ആര്. മുരളീധരന്, ജില്ലാ ജനറല് സെക്രട്ടറിമാരായ കെ.പി. സുരേഷ്, ലിജിന് ലാല് തുടങ്ങിയവര് പ്രസംഗിച്ചു.
