വിളപ്പില്: കൊട്ടും കുഴല്വിളിയുമായി ബാഹുബലിയെ വരവേല്ക്കാന് കാലേയന്മാര് പട്ടണം ചുറ്റി. ആര്ത്തിരമ്പിയ കാണികള്ക്ക് നടുവിലേക്ക് ബാഹുബലി പറന്നിറങ്ങി രണ്ടാം വരവും ആഘോഷമാക്കി.
പുത്തന് പടങ്ങള് നഗരത്തില് മാത്രം റിലീസ് ചെയ്തിരുന്നപ്പോള് ഗ്രാമീണ മേഖലയിലെ സിനിമാ പ്രേമികള് കടുത്ത നിരാശയിലായിരുന്നു. അടുത്തിടെയാണ് നഗരങ്ങളിലെന്ന പോലെ ഗ്രാമ പ്രദേശങ്ങളിലെ സിനിമാശാലകളിലും പുതിയ സിനിമകള്ക്ക് പ്രദര്ശനാനുമതി ലഭിച്ചത്. കാട്ടാക്കട താലൂക്കില് പേയാട് എസ്പി സിനിമാസിലാണ് ഇന്നലെ ബാഹുബലി പ്രദര്ശനത്തിനെത്തിയത്. രാവിലെ ഏഴ് മണിക്ക് ആദ്യ പ്രദര്ശനം ആരംഭിക്കാന് തുടങ്ങവെയാണ് ചിത്രത്തിലെ വില്ലന് കഥാപാത്രമായ കാലേയന്റെ വേഷവിധാനങ്ങളോടെ ഇരുപതോളം യുവാക്കള് തീയറ്ററില് ഇരച്ചുകയറിയത്.
യുവ നടന്മാര് അഭിനയിക്കുന്ന ബ്രഹ്മാണ്ഡ ചിത്രങ്ങളുടെ റിലീസ് ദിവസം പേയാട് ചന്തമുക്കിലെ എംജെ നാസിക്സ് എന്ന യൂത്ത് ഗ്യാങ്ങാണ് ആവേശ നൃത്തമാടി തീയറ്ററുകളില് രംഗം കൊഴുപ്പിക്കാനെത്തുന്നത്. സജിത്, ഗോകുല്, അഭിഷേക് എന്നിവരുടെ നേതൃത്വത്തിലായിരുന്നു ഇന്നലെ പേയാട്ട് ഫയര് ഡാന്സും മേളക്കൊഴുപ്പുമായി യൂത്ത് ഗ്യാങ്ങിന്റെ അഭ്യാസ പ്രകടനം.
