കോട്ടയം: ഗതാഗത പരിഷ്കാരങ്ങള് നടപ്പില് വരുത്തുന്നതിന് ആവിഷ്കരിച്ചിട്ടുള്ള പദ്ധതികളുടെ പ്രാരംഭഘട്ടമായി മോഡല് ജംഗ്ഷനുകള് തിരഞ്ഞെടുത്തു. ആധുനിക രീതിയിലുള്ള സംവിധാനങ്ങള് ക്രമീകരിക്കുന്നതിനുള്ള നടപടികളുടെ ഭാഗമായി കോട്ടയം ജില്ലയില് 5 സ്ഥലങ്ങള് തിരഞ്ഞെടുത്തതായി ജില്ലാ പോലീസ് മേധാവി എന്. രാമചന്ദ്രന് അറിയിച്ചു. സംസ്ഥാനത്ത് ഈ പദ്ധതി ആദ്യമായി നടപ്പാക്കുന്ന ജില്ല കോട്ടയമാണ്.
പൊന്കുന്നം കുരിശുപള്ളി ജംഗ്ഷന്, പാലാ ആശുപത്രി ജംഗ്ഷന്, ഏറ്റുമാനൂര്, തെങ്ങണ, കടുത്തുരുത്തി എന്നീ ജംഗ്ഷനുകളാണ് തെരഞ്ഞെടുത്തിട്ടുള്ളത്. റോഡു നിര്മ്മാണത്തിന് ഉപയോഗിച്ച് വരുന്ന 3ഇ സംവിധാനം പ്രാബല്യത്തില് വരുത്തി സുഗമമായ ഗതാഗത സംവിധാനം മുന്നില് കണ്ടുള്ള നടപടിയാണ് ഇതിലൂടെ ഉദ്ദേശിക്കുന്നത്. ഇതിന്റെ ഭാഗമായി അനുയോജ്യമായ രീതിയിലുള്ള സിഗ്നല് ലൈറ്റുകള്, സിഗ്നല്/സീബ്രാ ലൈനുകള്, ക്യാമറകള് മുതലായവ ക്രമീകരിച്ചിട്ടുണ്ട്. ഈ ജംഗ്ഷനുകളില് ഗതാഗത ലംഘനം നടത്തിയാല് വിവരം ലഭിക്കുന്നതിനുള്ള സംവിധാനങ്ങള് ഉണ്ടാകും. അതിലൂടെ വളരെ വേഗതയില് നിയമലംഘനങ്ങള് കണ്ടെത്തി നടപടികള് സ്വീകരിക്കുന്നതിന് സാധിക്കുമെന്നും അദ്ദേഹം പറഞ്ഞു.
