കാക്കനാട്: ജില്ലയിലെ കോളനികള് മദ്യം, മയക്കുമരുന്നു ലോബിയുടെ പിടിയിലാകുന്നു. സിറ്റി പോലീസ് മേധാവിക്ക് നിരവധി പരാതികളാണ് ഇതിനോടകം ലഭിച്ചിരിക്കുന്നത്.
പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ച സംഭവം ഉള്പ്പെടെ ചൂണ്ടിക്കാട്ടിയാണ് കോളനി നിവാസികള് പോലീസ് ഉന്നതര്ക്ക് മയക്കുമരുന്നു ലോബിക്കെതിരെ ആഞ്ഞടിച്ചത്. തുതിയൂര് കുന്നത്ത്ചിറ പട്ടികജാതി കോളിനിയില് സിറ്റി പോലീസ് കമ്മീഷണര് എന്.പി. ദിനേശിന്റെ കോളനി സന്ദര്ശന പരിപാടിയിലാണ് പരാതികള് ഉയര്ന്നത്. തൃക്കാക്കര പോലീസിന്റെ ജനമൈത്രി പരിപാടിയുടെ ഭാഗമായാണ് പോലീസ് മേധാവിയുടെ കോളനി സന്ദര്ശനം.
ഒന്നര മാസം മുമ്പാണ് പ്രായപൂര്ത്തിയാകാത്ത പെണ്കുട്ടിയെ മയക്കുമരുന്നു സംഘം തട്ടിക്കൊണ്ടുപോയി പീഡിപ്പിച്ചത്. സംഭവുമായി ബന്ധപ്പെട്ട് ആറംഗ സംഘത്തെ അറസ്റ്റ് ചെയ്തെങ്കിലും മയക്കുമരുന്നുലോബി ഇപ്പോഴും നാട്ടില് സജീവമാണെന്ന് നാട്ടുകാര് പറയുന്നു. തങ്ങളുടെ കുട്ടികളും മയക്ക് മരുന്നു ലോബിയുടെ സ്വാധീന വലയത്തില് അകപ്പെട്ടേക്കുമെന്ന ഭീതിയിലാണ് മാതാപിതാക്കള്.
ആളൊഴിഞ്ഞ വീടുകളും പെരിയാര്വാലി പ്രദേശങ്ങളും പാറമടകളും സംഘം താവളമാക്കുകയാണ്. വ്യവസായ മേഖല പരിസര പ്രദേശങ്ങളും മയക്കുമരുന്നു ലോബിയുടെ പിടിയിലാണെന്നും നാട്ടുകാര് പരാതിപ്പെട്ടു. ആളൊഴിഞ്ഞ പാടശേഖരങ്ങളും വഴിയോരങ്ങളിലും കക്കൂസ് മാലിന്യം തള്ളുന്ന മാഫിയ സംഘം ആയുധങ്ങളുമായി എത്തിയാണ് പരിസരവാസികള്ക്ക് ഭീഷണി ഉയര്ത്തുന്നത്.
സഞ്ചാര യോഗ്യമായിരുന്ന റോഡ് കുത്തിപ്പൊളിച്ചത് മൂലം പൊതുജനങ്ങള്ക്ക് നടക്കാന് കഴിയുന്നില്ലെന്നും പരാതി ഉയര്ന്നു. പൊതു വാഹന സൗകര്യത്തിന്റെ അപര്യാപ്ത മുതലാക്കി കഴുത്തറുപ്പന് കൂലി വാങ്ങി ഓട്ടേറിക്ഷക്കാരുടെ ഉള്പ്പെടെ കടുത്ത ചൂഷണത്തിലാണ് നാട്ടുകാര്. വര്ഷങ്ങളായി മുങ്ങിക്കിടക്കുന്ന തുതിയൂര് കാബളത്ത് പാറയില് പുറമെ നിന്നുള്ള കുട്ടികള് നീന്താന് എത്തുന്നത് വന്അപകട സാധ്യതയുണ്ടെന്നും നാട്ടുകാര് ചൂണ്ടിക്കാട്ടി.
തൃക്കാക്കര പോലീസ് ജാഗ്രത സമിതികള് രുപീകരിച്ച് പ്രശ്ന പരിഹാരമുണ്ടാക്കുമെന്നും മെയ് പത്തിന് കൗണ്സിലിങ് സെന്റര് ആരംഭിക്കുമെന്നു സിറ്റി പോലീസ് കമ്മീഷണര് ഉറപ്പ് നല്കി. കുന്നത്തുചിറ കെപിഎംഎസ് ഓഫിസ് പരിസരത്ത് സംഘടിപ്പിച്ച ചടങ്ങില് നഗരസഭ കൗണ്സിലര് ഷീല ചാരു അദ്ധ്യക്ഷയായി. കൗണ്സിസര് ജെയ്മി, തൃക്കാക്കര അസി.കമീഷണര് എം. ബിനോയ്, കളമശേരി സര്ക്കിള് ഇന്സ്പെക്ടര് എസ്. ജയകൃഷ്ണന്, തൃക്കാക്കര എസ്ഐ എ.എന്. ഷാജു തുടങ്ങിയവരും പങ്കെടുത്തു.
