കോട്ടയം: കത്തോലിക്ക കോണ്ഗ്രസ് ശതാബ്ദി നിറവില്. ഒരുവര്ഷം നീണ്ടു നില്ക്കുന്ന ആഘോഷ പരിപാടികളുടെ ദേശിയ ഉദ്ഘാടനം 28 ന് കോട്ടയം മാമന് മാപ്പിള ഹാളില് നടക്കുമെന്ന് ഭാരവാഹികള് പത്രസമ്മേളനത്തില് അറിയിച്ചു.
ഉച്ചകഴിഞ്ഞ് 2.30ന് നടക്കുന്ന സമ്മേളനം അതിരൂപതാ ആര്ച്ച് ബിഷപ്പ് മാര് മാത്യു മൂലക്കാട്ടില് ഉദ്ഘാടനം ചെയ്യും. ചടങ്ങില് പ്രസിഡന്റ് വി.വി അഗസ്റ്റിന് അധ്യക്ഷത വഹിക്കും. മന്ത്രി കെ.റ്റി ജലീല് മുഖ്യപ്രഭാഷണവും ആര്ച്ച് ബിഷപ് മാര് ജോസഫ് പൗവത്തില് അനുഗ്രഹ പ്രഭാഷണവും നടത്തും. യോഗത്തില് സ്വാമി സച്ചിദാനന്ദ മാനവ മൈത്രി സന്ദേശം നല്കും. ശതാബ്ദി ആഘോഷത്തോട് അനുബന്ധിച്ച് നടപ്പാക്കുന്ന ഭൂദാന പദ്ധതിയുടെ ഉദ്ഘാടനം കാഞ്ഞിരപ്പള്ളി ബിഷപ് മാര് മാത്യു അറയ്ക്കലും ശതാബ്ദി കര്മ്മ പദ്ധതിയുടെ പ്രകാശനം പാലാ ബിഷപ് ജോസഫ് കല്ലറങ്ങാട്ടും നിര്വഹിക്കും.
പത്രസമ്മേളനത്തില് പ്രസിഡന്റ് വി.വി അഗസ്റ്റിന്, ഡയറക്ടര് ജിയോ കടവി, കേന്ദ്ര ജനറല് സെക്രട്ടറി അഡ്വ. ബിജു പറന്നിലം, വൈസ് പ്രസിഡന്റ് അഡ്വ. സ്റ്റീഫന് ജോര്ജ്ജ്, സൈബി അക്കര, ടോമി ഇളംന്തോട്ടം ,ജോസ്കുട്ടി മാടപ്പള്ളി തുടങ്ങിയവര് പങ്കെടുത്തു.
