കണ്ണൂര്: അടുത്ത അക്കാദമിക വര്ഷത്തെ പ്രവര്ത്തനങ്ങള് കാര്യക്ഷമമാക്കുന്നതിന്റെ ഭാഗമായി പൊതു വിദ്യാഭ്യാസ വകുപ്പും സര്വ്വശിക്ഷാ അഭിയാനും സംഘടിപ്പിക്കുന്ന അധ്യാപക പരിശീലനം ജില്ലയിലെ വിവിധ കേന്ദ്രങ്ങളില് ആരംഭിച്ചു. പഠനാന്തരീക്ഷം ശിശു സൗഹൃദവും പ്രചോദനാത്മകവും ആക്കുന്നതിന് പ്രൈമറി തലത്തില് ശാസ്ത്ര വിസ്മയ ചുമര്, ഗണിതം പഠനാന്തരീക്ഷം, ഭാഷാ പഠന ഗാലറികള്, ചരിത്ര മ്യൂസിയം തുടങ്ങിയവയുടെ സാധ്യതകള് പരിശീലനത്തില് ഉള്ക്കൊള്ളിച്ചിട്ടുണ്ട്. അതാത് വിഷയങ്ങള്ക്കു പുറമെ മുഴുവന് യു പി വിഭാഗം അധ്യാപകര്ക്ക് ഐ ടി അധിഷ്ഠിത അധ്യാപനത്തിന് ഉതകുന്ന പരിശീലനവും ഇത്തവണത്തെ പ്രത്യേകതയാണ്. സ്കൂളുകളില് നടപ്പാക്കുന്ന ജൈവ വൈവിധ്യ ഉദ്യാനത്തെക്കുറിച്ചുള്ള വിശദാംശങ്ങളും 8 ദിവസത്തെ പരിശീലന പരിപാടിയില് ചര്ച്ച ചെയ്യുന്നുണ്ട്.
പരിശീലന പരിപാടി പയ്യന്നൂര് സബ് ജില്ലയില് സി.കൃഷ്ണന് എംഎല്എ, മാടായിയില് ടി.വി.രാജേഷ് എംഎല്എ, കണ്ണൂര് നോര്ത്തില് എടക്കാട് ബ്ലോക്ക് പഞ്ചായത്ത് പ്രസിഡണ്ട് എംസി.മോഹനന്, പാനൂരില് നഗരസഭ വിദ്യാഭ്യാസ സ്റ്റാന്ഡിംഗ് കമ്മിറ്റി ചെയര് പേഴ്സണ് കെ.സുഹറ, തളിപ്പറമ്പ് സൗത്തില് മയ്യില് ഗ്രാമ പഞ്ചായത്ത് വിദ്യാഭ്യാസ സ്റ്റാന്ഡിംഗ് കമ്മിറ്റി ചെയര്മാന് പി.കെ.പുരുഷോത്തമന്, ഇരിക്കൂറില് മുനിസിപ്പല് ചെയര്മാന് പി.പി.രാഘവന് എന്നിവര് ഉദ്ഘാടനം ചെയ്തു.
