എരുമേലി: സര്വ്വസിദ്ധി വിനായക ക്ഷേത്രത്തില് ശ്രീമദ് ഭാഗവത സപ്താഹ മഹാജ്ഞാനയജ്ഞത്തിന് ആചാര്യനായി എത്തിയത് 25 കാരനായ ശബരിനാഥ് ദേവിപ്രിയ. 18000 ശ്ലോകങ്ങളും 335 അദ്ധ്യായങ്ങളും 12 സ്കന്ദങ്ങളുമടങ്ങിയ ശ്രീമദ് മഹാഭാഗവതത്തെ ഭക്തജനങ്ങളുമായി ഏഴു ദിവസം സംവദിക്കാന് എത്തിയതാണ് ശബരിനാഥ് ദേവിപ്രിയ.
ശബരിമലയിലേയ്ക്കുള്ള തിരുവാഭരണം സ്ഥിരമായി ഇറക്കിവെയ്ക്കാറുള്ള പുരതാനകുടുംബമായ മണ്ഡകത്ത് തറവാട്ടിലെ ഇളംതലമുറക്കാരനാണ് ശബരിനാഥ്. െ്രെപമറി വിദ്യാഭ്യാസം മുതല് ആത്മീയ കാര്യങ്ങളില് ആകൃഷ്ടനായ ശബരിനാഥ് ഇതോടകം തന്നെ പതിനാറ് സപ്താഹയജ്ഞം വിവിധ കേന്ദ്രങ്ങളിലായി നടത്തി. നൂറോളം മതപ്രഭാഷണങ്ങള് നടത്തിയിട്ടുള്ള ശബരിനാഥ് അഖിലഭാരത സത്രവേദിയിലും, ചെറുകോല്പുഴ, റാന്നി ഹിന്ദുമതകണ്വന്ഷന് എന്നിവിടങ്ങളിലും ഇപ്പോള് സ്ഥിരം പ്രഭാഷകനുമാണ്. ബംഗളൂരുവില് നടന്ന പതിനൊന്നാമത് ശ്രീമദ് ഭഗവത് ഗീത ലോക സമ്മേളനത്തില് പ്രഭാഷണം നടത്തിയ ആദ്യ മലയാളിയാണ്.
മദ്രാസ് യൂണിവേഴ്സിറ്റിയില് പഠനം പൂര്ത്തിയാക്കി എം.എ. എംഫില് നേടിയ ശബരി ഇപ്പോള് പബ്ലിക് അഡ്മിനിസ്ട്രേഷനില് പിഎച്ച്ഡി ചെയ്യുകയാണ്. ജൂണില് നടക്കുന്ന സിവില് സര്വ്വീസ് പരീക്ഷയ്ക്ക് തയ്യാറെടുക്കുന്ന ശബരിനാഥ് നാരായണീയ പ്രചരണവുമായി അടുത്ത മാസം യൂറോപ്യന് പര്യടനത്തിന് പുറപ്പെടും. റാന്നി ദേവിപ്രിയയില് സി.ജി. ശശിധരന്പിള്ളയുടേയും ഗിരിജയുടേയും ഏകമകനാണ്.
