കോട്ടയം: വിഷുദിനത്തില് കണിദര്ശനവുമായി ഭവനസന്ദര്ശനം നടത്തി ലഭിച്ച വിഷുക്കൈനീട്ടം അഗതികള്ക്ക് നല്കി തിരുനക്കര മഹാദേവക്ഷേത്രത്തിലെ മതപാഠശാലാ ബാലഗോകുലം വിദ്യാര്ത്ഥികള് മാതൃകയായി. രാവിലെ 6മുതലാണ് കുട്ടികള് മതപാഠശാല അദ്ധ്യാപിക സിന്ധുവിന്റെ നേതൃത്വത്തില് വിഷുക്കണിയുമായി ഭവനങ്ങളില് സന്ദര്ശനം നടത്തിയത്. ഇവര്ക്ക് കിട്ടിയ മുഴുവന് തുകയും തിരുനക്കരയില് പ്രവര്ത്തിക്കുന്ന അജയ്സ്മൃതി ചാരിറ്റബിള് ട്രസ്റ്റിന് കൈമാറുകയായിരുന്നു. നാല് വിദ്യാര്ത്ഥികള് താമസിച്ച് പഠിക്കുകയും കേരളത്തിലെമ്പാടും നിര്ദ്ധന വിദ്യാര്ത്ഥികള്ക്ക് പഠനോപകരണങ്ങളും പുസ്തകങ്ങളും നല്കിവരുകയും ചെയ്യുന്ന സ്ഥാപനമാണിത്. കൂടാതെ രോഗികള്ക്കും വൃദ്ധജനങ്ങള്ക്കും മരുന്നും വസ്ത്രവുമെല്ലാം ട്രസ്റ്റിന്റെ നേതൃത്വത്തില് നല്കിവരുകയും ചെയ്യുന്നു.
തിരുനക്കര മഹാദേവക്ഷേത്രത്തില് പ്രവര്ത്തിച്ചുവരുന്ന മതപാഠശാലയില്, ഗീത, ഹിന്ദുമതതത്വങ്ങള്, പുരാണപരിചയം, സംസ്കൃതപാഠം എന്നിവയാണ് കുട്ടികളെ പഠിപ്പിച്ചുവരുന്നത്. പ്ലസ്ടുവരെയുള്ള കുട്ടികള്ക്ക് ക്ലാസുകളില് പങ്കെടുക്കാവുന്നതാണ്. വെക്കേഷന് സമയത്ത് എല്ലാദിവസവും രാവിലെ 9മുതല് 12വരെയും മറ്റുസമയങ്ങളില് ഞായറാഴ്ച ദിവസങ്ങളിലുമാണ് ക്ലാസ് നടന്നുവരുന്നത്. കഴിഞ്ഞവര്ഷം ലഭിച്ച വിഷുക്കൈനീട്ടം പുറ്റിങ്ങല് വെടിക്കെട്ടപകടത്തില് കഷ്ടതയനുഭവിക്കുന്നവര്ക്ക് വേണ്ടി സംഭാവന നല്കിയിരുന്നു.
