കണ്ണാടിപ്പറമ്പ്: കഴിഞ്ഞ അഞ്ചു ദിവസങ്ങളിലായി നടന്നു വരുന്ന ഉത്ര വിളക്കുമഹോത്സവത്തിന് നാളെ സമാപനമാകും. ആറാം ദിവസമായ ഇന്ന് വിഷുദിനത്തില് രാവിലെ 5 ന് കണിദര്ശനം. തുടര്ന്ന് ശ്രീഭൂതബലി, ആനപ്പുറത്തെഴുന്നള്ളത്ത്, വിശേഷാല് പൂജകള് എന്നിവ തന്ത്രി കരുമാരത്തില്ലത്ത് പരമേശ്വരന് നമ്പൂതിരിപ്പാടിന്റെ കാര്മികത്വത്തില് നടക്കും. വൈകുന്നേരം 5 ന് കാഴ്ചശീവേലി, മട്ടന്നൂര് പഞ്ചവാദ്യസംഘത്തിന്റെ പഞ്ചവാദ്യം, ചെണ്ടമേളം, ചന്തം എന്നിവയും രാത്രി 8 ന് അത്താഴക്കുന്ന് സൗപര്ണിക കലാവേദി അവതരിപ്പിക്കുന്ന നാട്ടരങ്ങ്, രാത്രി10 ന് ലക്ഷ്മികാന്ത് അഗ്ഗിത്തായയും ശിഷ്യനും നേതൃത്വം നല്കുന്ന തിടമ്പുനൃത്തവും നടക്കും.
നാളെ ഉത്സവ ചടങ്ങുകള്ക്കു ശേഷം രാത്രി 8 ന് മയ്യില് നന്തുടി കലാ സംഘം അവതരിപ്പിക്കുന്ന മെഗാഷോ കാവേറ്റം, 10 ന് കണ്ണാടിപ്പറമ്പ് ഗണപതി ക്ഷേത്രത്തില് നിന്നും കരടി വരവ് തുടര്ന്ന് ഗണേശ് വാദ്യസംഘം അവതരിപ്പിക്കുന്ന തായമ്പക. ശേഷം പള്ളിവേട്ടക്കെഴുന്നള്ളത്ത്, ചന്തം, കരടികളി, ഗോപുരത്തില് എഴുന്നള്ളിക്കല്, തിടമ്പുനൃത്തം. തുടര്ന്ന് എരിഞ്ഞിക്കല് ദേവസ്വം അവതരിപ്പിക്കുന്ന പൂരക്കളി. ഞായറാഴ്ച കാലത്ത് 9 മണിക്ക് ആറാട്ട്. തുടര്ന്ന് കൊടിയിറക്കം, ആറാട്ട് സദ്യ.
