തിരുവനന്തപുരം: കഴിഞ്ഞ അഞ്ചുവര്ഷത്തിനിടെ മൂന്നുപാര്ട്ടികള്, മൂന്ന് കൊടികള്.വീരന്റെ പാര്ട്ടിയാണ് പാര്ട്ടി. എം.പി വീരേന്ദ്രകുമാറിന്റെ ജനതാദള് വിഭാഗമാണ് മൂന്ന് പേരിലായി പ്രവര്ത്തിച്ച് ചരിത്രം കുറിച്ചത്. ഈ കാലയളവില് അണികള് മാറിമാറി പിടിച്ചത് മൂന്ന് കൊടികള്.
വീരേന്ദ്രകുമാര് ഇടതുമുന്നണിക്കൊപ്പം നിന്നപ്പോള് ജനതാദള് സെക്കുലറായിരുന്നു. കോഴിക്കോട് ലോക്സഭാ സീറ്റ് നല്കാതെ വീരനെ ഇടതുമുന്നണി പറ്റിച്ചതോടെ ആ ബന്ധം തെറ്റി. അന്നത്തെ സിപിഎം സംസ്ഥാന സെക്രട്ടറി പിണറായി വിജയനുമായി വീരേന്ദ്രനുള്ള അനൈക്യമായിരുന്നു സീറ്റ് നിഷേധിക്കാന് കാരണമായതെന്നാണ് പിന്നാമ്പുറ സംസാരം.
ലാവ്ലിന് കുരുക്കില് അടിമുടി ഉലഞ്ഞുനിന്ന പിണറായിയെ സ്വന്തം പത്രത്തിലൂടെ വീരന് നിരന്തരം ലേഖനമെഴുതി ആക്രമിച്ചതാണ് സീറ്റ് നിരാകരിക്കാന് സിപിഎമ്മിനെ പ്രകോപിപ്പിച്ചത്. പിണറായിയുടെ ദുര്മുഖം കണ്ടുകൊണ്ട് കടിച്ചുതൂങ്ങി ഇടതില് തുടരാന് വീരന് തയ്യാറല്ലായിരുന്നു. 2010 ലെ നിയമസഭാ തെരഞ്ഞെടുപ്പിനു മുന്പ് തൃശൂരില് സോഷ്യലിസ്റ്റ് ജനത ഡെമോക്രാറ്റിക് രൂപീകരിച്ചു. ഇടതുപക്ഷ വിരുദ്ധരെ അണിനിരത്തി കേരളത്തില് മഹത്തായൊരു വിപ്ലവം എന്നതായിരുന്നു വീരന്റെ പ്രഖ്യാപനം. പക്ഷെ വീരന്റെ ഡെമോക്രാറ്റിക് പാര്ട്ടിക്ക് അല്പായുസ്സായിരുന്നു.
പാര്ട്ടിക്ക് സംസ്ഥാന പദവി കിട്ടുന്നതിനു മുമ്പ് മറ്റൊരു പാര്ട്ടിയുമായി വീരന്റെ സോഷ്യലിസ്റ്റ് ജനത ഡെമോക്രാറ്റിക് ലയിച്ചു. 2014 ല് നിതീഷ്കുമാര് നേതൃത്വം നല്കുന്ന ജനതാദള് യുണൈറ്റഡിലായിരുന്നു വീരന് സ്വന്തം കൊടിവച്ച് കീഴടങ്ങി പുതിയ കൊടി പിടിച്ചത്.
ജനതാദള് യുണൈറ്റഡ് വിവിധ ജനതാ പാര്ട്ടികള് ചേര്ന്ന് ജനതാ പരിവാര് എന്ന പേരില് പുതിയ പാര്ട്ടിയുണ്ടാക്കാന് ശ്രമം നടത്തി. പാര്ട്ടികള്ക്കുള്ളിലെ പടലപിണക്കം കാരണം പരിവാര് മോഹം പാതിവഴിയില് മുടങ്ങി. അല്ലെങ്കില് വീരനൊപ്പം നിന്നവര് മറ്റൊരു കൊടികൂടി പിടിക്കേണ്ടി വന്നേനെ.
കറ്റയേന്തിയ കര്ഷക സ്ത്രീയായിരുന്നു സെക്കുലര് ജനതയിലായിരുന്നപ്പോള് വീരന്റെ ചിഹ്നം. കഴിഞ്ഞ തെരഞ്ഞെടുപ്പില് മോതിരമായിരുന്നു. ഇത്തവണ ജനതാദള് യുണൈറ്റഡ് ആയപ്പോള് അസ്ത്രമാണ് ചിഹ്നം. കറ്റയേന്തിയ കര്ഷക സ്ത്രീ ചിഹ്നം ഇപ്പോള് മാത്യു ടി. തോമസ് നേതൃത്വം നല്കുന്ന ജനതാദളിനാണ്. മുന്പ് കപ്പും സോസറും, മരം, ചക്രം, എന്നീ ചിഹ്നങ്ങളിലും ജനതാദള് മത്സരിച്ചിരുന്നു.
നിലവില് രണ്ട് എംഎല്എമാരാണ് വീരന്റെ പാര്ട്ടിക്കുള്ളത്. മാത്യൂ ടി. തോമസിന് നാലു എംഎല്എമാരുണ്ട്. ജനതാദള് സെക്കുലറിനെ കേരളവും കര്ണ്ണാടകവും സംസ്ഥാന പാര്ട്ടികളായി അംഗീകരിച്ചിട്ടുണ്ട്.
ഓരോതവണ പാര്ട്ടി മാറുമ്പോഴും കൊടിയും മാറ്റുകയണ് വീരന്റെ രീതി. ഇരുവശങ്ങളിലും പച്ചയും നടുവില് വെള്ളയും നിറമുള്ള കൊടിയില് പല്ച്ചക്രം ആലേഖനം ചെയ്ത കൊടിയായിരുന്നു ഡമോക്രാറ്റിക് ജനതയുടേത്. യുണൈറ്റഡില് ലയിച്ചപ്പോള് പല്ച്ചക്രം വലിച്ചെറിഞ്ഞ് അവിടെ അമ്പ് പ്രതിഷ്ഠിച്ചു. സെക്കുലര് ജനത (ഗൗഡ) യില് ആയിരുന്നപ്പോള് പച്ചയും വെള്ളയും നിറങ്ങള് കൂടിയോജിപ്പിച്ച കൊടിയില് കറ്റയേന്തിയ കര്ഷകയായിരുന്നു വീരന്റെ അടയാളം. വി.പി സിംഗിന്റെ കാലത്ത് ചക്രവും വീരന് അടയാളമാക്കിയിട്ടുണ്ട്.
പിളര്പ്പില് നിന്നും പിളര്പ്പിലേക്ക് നയിക്കുന്ന പാര്ട്ടിയെ ഇപ്പോള് യുഡിഎഫിന്റെ തൊഴുത്തിലാണ് വീരന് കെട്ടിയിരിക്കുന്നത്. അസ്വാരസ്യങ്ങള് പുകഞ്ഞുതുടങ്ങിയ യുഡിഎഫ് മുന്നണിയില്നിന്ന് എന്ന് പടിയിറങ്ങുമെന്ന് പറയാനാവില്ല. പക്ഷെ അണികള് ഒരു കാര്യം ഉറപ്പിക്കുന്നുണ്ട്. ഉടനെ കൊടിയും പാര്ട്ടിയും മാറേണ്ടി വന്നേക്കുമെന്ന്. കാരണം എല്ഡിഎഫിലായാലും യുഡിഎഫിലായാലും എത്രയെന്നു കരുതിയാണ് വീരന് അവഗണനയും അധിക്ഷേപവും സഹിച്ച് കഴിയുന്നത്.
ഇംഗ്ലീഷ് അക്ഷരമാലയില് ഇനിയും അക്ഷരങ്ങള് ശേഷിക്കുന്നതിനാല് ജനതയെന്ന് പേരിനൊപ്പം ഒരക്ഷരം ചേര്ത്തു വയ്ക്കുന്ന ജോലിയെ വീരേന്ദ്രകുമാറിനുള്ളു. പുതിയ പാര്ട്ടി റെഡി. ഏറ്റവും അധികം പാര്ട്ടിയുണ്ടാക്കിയ നേതാവെന്ന റെക്കോര്ഡ് ഗിന്നസ് ബുക്കില് വരുത്തുകയാണ് വീരന്റെ ലക്ഷ്യമെന്നാണ് അണിയറ സംസാരം.
