എരുമപ്പെട്ടി: കടങ്ങോട് കൊട്ടിലിപറമ്പില് സുരേഷ്കുമാറും കുടുംബവും കടബാധ്യതമൂലം ജീവനൊടുക്കിയ സംഭവത്തില് ബ്ലേഡ് മാഫിയകളുടെ പങ്കിനെക്കുറിച്ച് അന്വേഷിക്കണമെന്നാവശ്യപ്പെട്ട് ബന്ധുക്കള് ഉന്നത പോലീസ് അധികാരികള്ക്ക് പരാതി നല്കി.
സുരേഷ്കുമാറിന്റെ ജ്യേഷ്ഠസഹോദരന് മണികണ്ഠനാണ് നിയമ സഹായസമിതിയുടെ നേതൃത്വത്തില് തൃശൂര് റൂറല് എസ്പി എന്.വിജയകുമാര് ഉള്പ്പടെയുള്ള പോലീസ് ഉദ്യോഗസ്ഥര്ക്ക് പരാതി നല്കിയിരിക്കുന്നത്.
കടുത്ത സാമ്പത്തിക ബാധ്യതയില് കഴിഞ്ഞിരുന്ന സുരേഷ്കുമാര് വീടും സ്ഥലവും വില്പ്പന നടത്തി കടങ്ങള് വീട്ടാനായിരുന്നു പദ്ധതിയിട്ടിരുന്നത്. എന്നാല് സുരേഷ്കുമാറിന് കടബാധ്യതയുള്ള ബ്ലേഡ് ഭൂമാഫിയ സംഘങ്ങള് വസ്തുവഹകള് കൈവശപ്പെടുത്തുന്നതിന് വേണ്ടി വില്പ്പന തടഞ്ഞ് ഇവരെ സമ്മര്ദ്ദത്തിലാക്കുകയായിരുന്നു.
വീടും സ്ഥലവും വില്പ്പന നടത്തി കടങ്ങള് വീട്ടാനായിരുന്നു തീരുമാനിച്ചിരുന്നതെന്നും ഇത് നടക്കാത്തതിനാല് ഞങ്ങള് ജീവിതം അവസാനിപ്പിക്കുകയാണെന്നും സുരേഷ്കുമാര് ആത്മഹത്യ കുറിപ്പില് സൂചിപ്പിച്ചിരുന്നു. സുരേഷ്കുമാറിനേയും കുടുംബത്തേയും ഭീഷണിപ്പെടുത്തിയിരുന്ന വ്യക്തികള്ക്കെതിരെ രേഖകള് സഹിതമാണ് മണികണ്ഠന് പരാതി നല്കിയിരിക്കുന്നത്.
ഇവര്ക്കെതിരെ ആത്മഹത്യ പ്രേരണക്ക് കേസെടുക്കണമെന്നും പരാതിയില് ആവശ്യപ്പെട്ടിട്ടുണ്ട്.
