പുതുച്ചേരി: സംസ്ഥാനത്തെ നാലു ഗവ.ഫ്രഞ്ച് വിദ്യാലയങ്ങളിലെ ത്രാസ്യാം എന്ന പത്താം കഌസുകാര്ക്കുളള ബ്രവേ എലൈമാന്തേര് പരീക്ഷയുടെ ഭാഗമായ ഓറാല്സ് എന്നറിയപ്പെടുന്ന വാചാ പരീക്ഷ പുതുച്ചേരിയില് പൂര്ത്തിയായി.
മയ്യഴിയിലെ ഏക ഫ്രഞ്ചു ഹൈസ്കൂളായ എക്കോള് സെന്ത്രാള് എ കൂര് കോംപ്ലമാന്തേറടക്കം നാലു വിദ്യാലയത്തിലെ പത്താം ക്ലാസ് എഴുത്തു പരീക്ഷയില് അമ്പതു ശതമാനത്തില് കുറയാത്ത മാര്ക്കുനേടി അര്ഹത ലഭിച്ച ഇരുനൂറോളം കുട്ടികളാണ് പോണ്ടിച്ചേരി ആസ്ഥാനത്തു നടന്ന ബ്രവേ എലൈമാന്തേര് ഒറാല്സ് പരീക്ഷയില് പങ്കെടുത്തത്.
എഴുത്തു പരീക്ഷയുടെ ചോദ്യക്കടലാസുകളെ അടിസ്ഥാനമാക്കി ഫ്രഞ്ച്, ഇംഗഌഷ്, കണക്ക്, സയന്സ്, ഹിസ്റ്ററി, ജ്യോഗ്രഫി എന്നിവക്കു പുറമെ മയ്യഴിയിലെ കുട്ടികള്ക്ക് മലയാളത്തിനും മറ്റുളളവര്ക്ക് തമിഴിനും പ്രത്യേകം വാചാ പരീക്ഷയാണു നടന്നത്. കുട്ടികള് ഓരോ വിഷയത്തിലും നേടിയ അറിവ് വിലയിരുത്തുകയാണ് വാചാപരീക്ഷ കൊണ്ട് ഉദ്ദേശിക്കുന്നത്. ഒപ്പംകുട്ടികള് നേടിയ ശേഷികള് വിലയിരുത്താനായി ചിത്രരചന, തുന്നല്, സ്പോര്സ് ആന്റ് ഗെയിംസ് പ്രത്യേക മൂല്യ നിര്ണയവുമുണ്ടായി. കൃത്യതയോടെ ചിട്ടയായി നടന്ന പരീക്ഷയിലും വിലയിരുത്തലിലും രക്ഷിതാക്കളും കുട്ടികളും അധ്യാപകരും സംതൃപ്തി അറിയിച്ചു.
മെയ് മാസത്തില് അവസാനഫലം പുറത്തു വരുമ്പോള് തുടര്ച്ചയായി ഒമ്പതാം തവണയും നൂറു ശതമാനം വിജയം ആവര്ത്തിക്കാനാകും എന്ന പ്രതീക്ഷയിലാണ് മാഹി എക്കോള് സെന്ത്രാള് എ കൂര് കോംപ്ല മാന്തേറിലെ വിദ്യാര്ത്ഥികളും അധ്യാപകരും രക്ഷിതാക്കളും.
