ജില്ലാകോടതി പാലത്തിനു സമീപത്തെ ഡിവൈഡര് തകര്ന്ന
നിലയില്
ആലപ്പുഴ: വീതിയില്ലാത്ത ജില്ലാക്കോടതി ജങ്ഷന് റോഡില് സ്ഥാപിച്ച ഡിവൈഡര് തകര്ന്നു. കഴിഞ്ഞ ദിവസം വാഹനമിടിച്ചാണ് ഡിവൈഡര് നശിച്ചത്. ഏറെ തിരക്കുള്ള റോഡില് അശാസ്ത്രീയമായിട്ടാണ് ഡിവൈഡര് സ്ഥാപിച്ചത്. എന്നാല് സ്വകാര്യ സ്ഥാപനം അവരുടെ പരസ്യത്തിന്റെ ഭാഗമായി സ്ഥാപിച്ചതാണെന്നും ആക്ഷേപമുണ്ട്. വീതിയില്ലാത്ത റോഡില് ഡിവൈഡര് സ്ഥാപിച്ചതോടെ പടിഞ്ഞാറുനിന്നും വരുന്ന വലിയ വാഹനങ്ങള്ക്ക് വടക്കോട്ട് തിരിയാന് കഴിയാത്ത അവസ്ഥയാണ്.
ഏറ്റവും തിരക്കേറിയ രാവിലെ ഒന്പതുമുതല് 12 മണിവരെ വന് ഗതാഗതക്കുരുക്കാണ്. രണ്ടായിരത്തിലധികം ബസുകളും കാറുകളുമാണ് ടൂറിസ്റ്റുകളുമായി ആലപ്പുഴയിലെത്തുന്നത്. ഇവരുമായി എത്തുന്ന വാഹനം കടത്തിവിടുന്നതിനായി വാഹനങ്ങള് തടയുന്നതോടെ ഗതാഗതക്കുരുക്ക് രൂക്ഷമാകുന്നു. ട്രാഫിക് ഐലന്റിനോടു ചേര്ന്ന് കയറുകെട്ടി ഗതാഗതം നിയന്ത്രിക്കുന്നത് കാല്നടയാത്രക്കാര്ക്ക് കെണിയാകുന്നു. കയറില്ത്തട്ടി താഴെവീഴുന്നവരുടെ എണ്ണം നിത്യേന കൂടുന്നു. പ്രായമായവരാണ് അപകടത്തില്പ്പെടുന്നവരിലേറെയും.
