മട്ടാഞ്ചേരി: ജനകീയ പ്രതിഷേധത്തെ തുടര്ന്ന് പാണ്ടിക്കൂടിയില് തുടങ്ങിയ മദ്യവില്പനശാലയില് മദ്യമിറക്കാതെ ലോറി മടങ്ങി. ഇന്നലെ ഉച്ചയോടെയാണ് അടച്ചുപൂട്ടല് സമരം നടക്കുന്ന മദ്യവില്പന കേന്ദ്രത്തില് ചരക്ക് ലോറി എത്തിയത്. കുട്ടികളും സ്ത്രീകളുമടങ്ങുന്ന സമരക്കാര് പ്രതിഷേധവുമായി പ്രതിരോധം തീര്ത്തതോടെ ചുമട്ടുതൊഴിലാളികളും പിന്മാറി. ബിജെപിയുടെ നേതൃത്വത്തില് നടക്കുന്ന റിലെ ഉപവാസ സമരത്തില് പ്രശാന്ത് ശേണായ് ഉപവാസം നടത്തി. ജനകീയ സമര സമിതിയുടെ നേതൃത്വത്തില് നടക്കുന്ന ഉപരോധ സമരം നാലാം ദിനം പിന്നിട്ടു. തോപ്പുംപടിയില് നിന്ന് പാണ്ടിക്കുടിയിലേയ്ക്ക് മാറ്റിയ കണ്സ്യൂമര് ഫെഡിന്റെ മദ്യവില്പന കേന്ദ്രത്തിന് നഗരസഭയുടെ അനുമതിയില്ലെന്നത് മറച്ചു വെച്ചാണ് അധികൃതര് ഒത്താശ ചെയ്തതെന്ന് നാട്ടുകാര് പറഞ്ഞു.
നഗരസഭാംഗങ്ങളായ ശ്യാമളാ പ്രഭു, ബിജെപി മണ്ഡലം പ്രസിഡന്റ് പ്രവീണ് പ്രഭു, സെക്രട്ടറി ആന്റണി ലെയ്സണ്, വേണുഗോപാല് പൈ, സി.എസ്. രാജേഷ് ജനകീയ സമിതി ഭാരവാഹികളായ ഫാദര് ആന്റണി അറയ്ക്കല്, യേശുദാസ്, ദിനേശ് കമ്മത്ത് തുടങ്ങിയവര് നേതൃത്വം നല്കി.
