കണ്ണൂര്: ടെക്സ്റ്റെല് മാര്ക്കറ്റിംഗ് രംഗത്തെ പ്രശ്നങ്ങള് പഠിക്കാന് നന്ദകുമാര് ചെയര്മാനായ കമ്മിറ്റിയെ നിയോഗിച്ചതായും ഏപ്രിലില് കമ്മിറ്റി റിപ്പോര്ട്ട് നല്കുമെന്നും മന്ത്രി എ.സി മൊയ്തീന് പറഞ്ഞു. കണ്ണൂര് കോ-ഓപ്പറേറ്റീവ് സ്പിന്നിംഗ് മില് സന്ദര്ശിച്ച ശേഷം സംസാരിക്കുകയായിരുന്നു മന്ത്രി. നന്ദകുമാര് കമ്മറ്റി നല്കുന്ന റിപ്പോര്ട്ട് പഠിച്ച ശേഷം ലാഭകരമാകുന്ന തരത്തില് സ്പിന്നിംഗ് മില്ലുകളുടെ നവീകരണം സംബന്ധിച്ച് തീരുമാനമെടുക്കും. അടുത്ത അധ്യയന വര്ഷത്തേക്ക് പ്രൈമറി ക്ലാസുകളിലെ കുട്ടികള്ക്ക് യൂണിഫോം വിതരണം ചെയ്യാന് ആവശ്യമായ 10 ലക്ഷം മീറ്റര് തുണി ഉത്പാദിക്കുകയാണെന്ന് ലക്ഷ്യമെന്നും മന്ത്രി അറിയിച്ചു.
കണ്ണൂര് സ്പിന്നിംഗ് മില് കൂടുതല് ഉത്പാദനക്ഷമമാക്കുന്നതിനുള്ള തീരുമാനങ്ങളാണ് സര്ക്കാര് ആലോചിക്കുന്നത്. മില്ലില് കോട്ടണ് ടെസ്റ്റിംഗ് ലാബ് സ്ഥാപിക്കാനും പദ്ധതിയുണ്ട്. തൊഴിലാളികള്ക്ക് ഗുണകരമാകുന്ന തരത്തില് കുറഞ്ഞ പലിശയ്ക്ക് കൂടുതല് ലോണ് നല്കുന്ന പദ്ധതിയും നടപ്പാക്കും. പ്രതിസന്ധിയിലും കണ്ണൂര് സ്പിന്നിംഗ് മില്ലിന് പിടിച്ചുനില്ക്കാനായത് തൊഴിലാളികളുടെ ഇച്ഛാശക്തി കൊണ്ടാണെന്നും മന്ത്രി പറഞ്ഞു. പൊതുമേഖലാ സ്ഥാപനങ്ങള് പരസ്പര സഹകരണത്തോടെ പ്രവര്ത്തിച്ചാല് വന് ലാഭം നേടാനാകുമെന്നും മന്ത്രി ചൂണ്ടിക്കാട്ടി.
ശമ്പളം കുറവാണെന്ന പേരില് തൊഴിലാളികള് കൊഴിഞ്ഞ് പോയിട്ടുണ്ടെങ്കിലും പുതിയ തൊഴിലാളികളെ പരിശീലിപ്പിച്ചുകൊണ്ട് മില്ലുകളുടെ പ്രവര്ത്തനം പുനരുജ്ജീവിപ്പിക്കും. സ്കൂള് യൂണിഫോമുകള്ക്ക് ആവശ്യമായ നൂല് ലഭ്യമാക്കാന് സംസ്ഥാനത്തെ സ്പിന്നിംങ് മില്ലുകളെ പ്രയോജനപ്പെടുത്താനാണ് ഉദ്ദേശിക്കുന്നത്. കടത്തിലായ സ്ഥാപനങ്ങള്ക്ക് വായ്പ നല്കും. വായ്പ ലഭ്യമാക്കാന് ബജറ്റില് 57 കോടി രൂപ ടെക്സ്റ്റെല് മേഖലയ്ക്കായി അനുവദിച്ചിട്ടുണ്ടെന്നും മന്ത്രി പറഞ്ഞു. സ്പിന്നിങ് മില് പ്രവര്ത്തനം നോക്കിക്കണ്ട മന്ത്രി മില്ലിന്റെ ബ്ലോര് റൂം, സിംപ്ലക്സ്, സ്പിന്നിംഗ്, ഡബ്ലിംഗ്, റീലിംഗ് തുടങ്ങി വിവിധ വിഭാഗങ്ങള് സന്ദര്ശിച്ചു. മില് തൊഴിലാളികളുടെ കൂട്ടായ്മയായ സിസിഎസ്എം ആര്ട്സ് ക്ലബ് ഒഴിവ് നേരങ്ങളില് നടത്തിയ വാഴക്കൃഷി വിളവെടുപ്പും മന്ത്രി ഉദ്ഘാടനം ചെയ്തു.
കണ്ണൂര് കോ-ഓപ്പറേറ്റീവ് സ്പിന്നിംഗ് മില് ചെയര്മാന് എം.സുരേന്ദ്രന്, മാനേജിംഗ് ഡയറക്ടര് രമേശന്, മാനേജര് എം.എം.ചന്ദ്രശേഖരന്, ജില്ലാ വ്യവസായകേന്ദ്രം ജനറല് മാനേജര് ഡി. രാജേന്ദ്രന്, ദിനേശ് ഫുഡ്സ് ചെയര്മാന് സി. രാജന്, വിവിധ തൊഴിലാളി യൂണിയന് നേതാക്കളായ കെ.പി.അശോകന്, പി.കെ.സുരേഷ് ബാബു, ഇ.കെ.രമേശന്, പി.കെ.രാജന്, പി.ജയദേവന് എന്നിവര് സംബന്ധിച്ചു.
