പത്തനാപുരം: പിറവന്തൂര് പഞ്ചായത്തിന്റെ ബജറ്റ് അവതരണത്തിലും കല്ലുകടി. പ്രസിഡന്റും വൈസ് പ്രസിഡന്റും തമ്മിലുള്ള ശീതസമരം തുടര്കഥയാവുന്നു. തിങ്കളാഴ്ച നടന്ന ബജറ്റ് അവതരണം തന്റെ അറിവോടെയല്ല നടന്നത് എന്നാണ് പ്രസിഡന്റിന്റെ ഭാഷ്യം. എന്നാല് പ്രസിഡന്റ് ഒപ്പിട്ടുതന്ന ബജറ്റാണ് താന് അവതരിപ്പിച്ചതെന്നാണ് വൈസ് പ്രസിഡന്റിന്റെ വാദം. ഇവര് തമ്മിലുള്ള വിവാദങ്ങളും ചേരിപോരും തുടര്ക്കഥയായിരുന്നു.
പഞ്ചായത്ത് ഭരണസമിതി യോഗത്തില് പിറവന്തൂര് പഞ്ചായത്ത് പ്രസിഡന്റ് കോണ്ഗ്രസിനൊപ്പം ചേര്ന്ന് ചര്ച്ചയില് പങ്കെടുത്തതായിരുന്നു ആദ്യപ്രശ്നം. ഇതിനിടെ എഐവൈഎഫുകാരനായ പഞ്ചായത്ത് ഡ്രൈവറെ മാറ്റണമെന്നാവശ്യപ്പെട്ട് കേരളാ കോണ്ഗ്രസ് പ്രതിനിധിയായ വൈസ് പ്രസിഡന്റും സിപിഎം അംഗങ്ങളും രംഗത്ത് വന്നതോടെ പോര് മുറുകി. പിന്നാലെ ഗ്രാമപഞ്ചായത്തിലെ വെളിയിടവിസര്ജ്യമുക്ത പദ്ധതിയുടെ രണ്ടാംഘട്ട ഫണ്ട് വിനിയോഗവുമായി ബന്ധപ്പെട്ടും പ്രശ്നങ്ങളുണ്ടായി.
പഞ്ചായത്തില് വച്ച് നടന്ന വര്ക്കിംഗ് ഗ്രൂപ്പ് യോഗത്തിലും പ്രശ്നങ്ങള് ഉണ്ടാവുകയും വൈസ് ചെയര്മാന് രാജി വയ്ക്കുകയും ചെയ്തിരുന്നു. ഇതിന് തൊട്ടു പിന്നാലെയാണ് പുതിയ പ്രശ്നം. ബജറ്റ് അവതരണത്തിന്റെ ആദ്യം തന്നെ താന് ഇതില് നിന്നും വിട്ടുനില്ക്കുന്നതായി പ്രസിഡന്റ് അറിയിച്ചു. പദ്ധതികള് ഉള്പ്പെടുത്തിയിട്ടില്ലെന്നും ആരോപിച്ചു.
