കൊണ്ടോട്ടി: സിപിഎം ഏകപക്ഷീയമായി നിരവധി അക്രമങ്ങള് നടത്തിയ വാഴയൂര് പഞ്ചായത്തില് ഡിവൈഎഫ്ഐയുടെ നേതൃത്വത്തില് യുവജനപരേഡ് നടത്താനൊരുങ്ങുന്നു.
എരിതീയില് എണ്ണ പകരാനുള്ള ആസൂത്രിത ശ്രമമാണ് ഇതിന് പിന്നിലെന്ന് ബിജെപി കൊണ്ടോട്ടി മണ്ഡലം കമ്മറ്റി ആരോപിച്ചു. കഴിഞ്ഞ വര്ഷം പുതുക്കോട് നടന്ന രാഷ്ട്രീയ സംഘട്ടനത്തില് പരിക്കേറ്റ് ചികിത്സയില് കഴിഞ്ഞ സിപിഎം പ്രവര്ത്തകന് മരിച്ചത് മുതല് ചെറുകാവ്, വാഴയൂര് പഞ്ചായത്തുകളില് സിപിഎം അഴിഞ്ഞാടുകയാണ്.
ബിജെപി പ്രവര്ത്തകരെ തെരഞ്ഞുപിടിച്ച് അക്രമിക്കുകയാണ്. കൊലക്കേസ് പ്രതികൂടിയായ സിപിഎം നേതാവ് പി.ജയരാജനെ പങ്കെടുപ്പിച്ചുകൊണ്ട് ഈ പഞ്ചായത്തുകളില് യുവജനപരേഡ് നടത്താനാണ് ഡിവൈഎഫ്ഐ ശ്രമിക്കുന്നത്.
എസ്എസ്എല്സി പരീക്ഷ സമയത്ത് ഉച്ചഭാഷിണി നിയന്ത്രണമുള്ളപ്പോള് വിദ്യാര്ത്ഥികളുടെ സമാധാനം നശിപ്പിക്കാനും കൂടിയാണ് ഈ പരേഡ് നാടകം അരങ്ങേറുന്നത്. രാഷ്ട്രീയ സമ്മര്ദ്ദത്തിന് വഴങ്ങി പോലീസ് സിപിഎമ്മിന് ഒത്താശ ചെയ്ത് കൊടുക്കുന്നു. അക്രമങ്ങള്ക്ക് ആഹ്വാനം നല്കാന് നടത്തുന്ന യുവജനപരേഡ് നിരോധിക്കണമെന്നും ബിജെപി ആവശ്യപ്പെട്ടു.
യോഗത്തില് മണ്ഡലം പ്രസിഡന്റ് പി.ദിനേശന് അദ്ധ്യക്ഷനായി. മേഖലാ സെക്രട്ടറി എം.പ്രേമന്, സജീഷ് പുളിക്കല്, ബിജേഷ് കൊട്ടാരത്തില്, ഷിബു അനന്തായൂര്, കെ.പി.പ്രമോദ് എന്നിവര് സംസാരിച്ചു.
