കണ്ണൂര്: ജില്ലയുടെ വിവിധ ഭാഗങ്ങളില് കാട്ടാന ഉള്പ്പെടെയുള്ള വന്യമൃഗങ്ങളുടെ ആക്രമണം വര്ധിച്ചുവരുന്ന പശ്ചാത്തലത്തില് ഇത് തടയാന് വനത്തില് മൃഗങ്ങള്ക്കാവശ്യമായ വെള്ളവും ഭക്ഷണവും ലഭ്യമാക്കാന് നടപടിയെടുക്കണമെന്ന് ജില്ലാ പഞ്ചായത്ത് യോഗം ബന്ധപ്പെട്ട വകുപ്പുകളോട് ആവശ്യപ്പെട്ടു.
വനത്തില് ആവശ്യത്തിന് വെള്ളവും ഭക്ഷണവും കിട്ടാതെ വരുമ്പോഴാണ് വന്യമൃഗങ്ങള് ജനവാസ കേന്ദ്രങ്ങളിലേക്കിറങ്ങുന്നത്. ഇതുമൂലം ആളുകള് കൊല്ലപ്പെടുകയും വിളകളും മറ്റ് സ്വത്തുവകകളും നശിപ്പിക്കപ്പെടുകയും ചെയ്യുന്നത് പരിവായിരിക്കുകയാണ്. വേനല് കനക്കുന്നതോടെ വന്യജീവി ആക്രമണങ്ങള് കൂടുതലാവാനാണ് സാധ്യതയെന്നും ഇക്കാര്യത്തില് അടിയന്തര നടപടികള് ആവശ്യമാണെന്നും ജില്ലാ പഞ്ചായത്ത് പ്രസിഡന്റ് കെ.വി സുമേഷ് പറഞ്ഞു. സ്റ്റാന്റിംഗ് കമ്മിറ്റി ചെയര്മാന് വി.കെ.സുരേഷ് ബാബുവാണ് വിഷയം ജില്ലാ പഞ്ചായത്ത് യോഗത്തില് അവതരിപ്പിച്ചത്.
വന്യമൃഗങ്ങള് ജനവാസ കേന്ദ്രങ്ങളിലേക്കിറങ്ങുന്നത് തടയാനുള്ള ശാസ്ത്രീയവും പ്രായോഗികവുമായ മാര്ഗമെന്ന നിലയില് ഇക്കാര്യം ഗൗരവത്തോടെ പരിഗണിക്കപ്പെടേണ്ടതുണ്ട്. കുളങ്ങള് നിര്മിച്ചും പ്ലാവ് ഉള്പ്പെടെയുള്ള ഫലവൃക്ഷങ്ങള് കൂടുതലായി നട്ടുപിടിപ്പിച്ചും ദീര്ഘകാലാടിസ്ഥാനത്തില് പ്രശ്നത്തിന് ഒരു പരിധിവരെ പരിഹാരം കാണാനാവും. ഇക്കാര്യത്തില് അടിയന്തരമായി സ്വീകരിക്കേണ്ട നടപടികളെക്കുറിച്ച് ആലോചിക്കുന്നതിന് ബന്ധപ്പെട്ട ഉദ്യോഗസ്ഥരുടെ യോഗം അടുത്തദിവസം ചേരുമെന്നും ജില്ലാ പഞ്ചായത്ത് പ്രസിഡന്റ് പറഞ്ഞു.
പതിമൂന്നാം പഞ്ചവല്സര പദ്ധതിയുടെ കരട് സ്റ്റാറ്റസ് റിപ്പോര്ട്ട് യോഗം ചര്ച്ച ചെയ്തു. രണ്ടുദിവസത്തിനകം അന്തിമ റിപ്പോര്ട്ട് തയ്യാറാക്കും. മാര്ച്ച് ഒന്നിന് ബന്ധപ്പെട്ട അക്കാദമിക- അക്കാദമികേതര സ്ഥാപന മേധാവികള്, പരിശീലന കേന്ദ്രം തലവന്മാര് തുടങ്ങിയവരുടെ യോഗം ചേര്ന്ന് റിപ്പോര്ട്ട് വിശദ ചര്ച്ചയ്ക്ക് വിധേയമാക്കും.
നിലവിലെ പദ്ധതി നിര്വഹണവുമായി ബന്ധപ്പെട്ട പ്രശ്നങ്ങളും തടസ്സങ്ങളും നിര്വഹണ ഉദ്യോഗസ്ഥരുമായി ചര്ച്ച ചെയ്ത് ആവശ്യമായ പരിഹാര നിര്ദേശങ്ങള് നല്കി. വരള്ച്ച നേരിടുന്നതിന്റെ ഭാഗമായി ജില്ലാ പഞ്ചായത്തിനു കീഴിലുള്ള എല്ലാ കുടിവെള്ളപദ്ധതികളുടെയും നിര്മാണം മാര്ച്ച് 15നകം പൂര്ത്തീകരിക്കാന് യോഗം ബന്ധപ്പെട്ട നിര്വഹണ ഉദ്യോഗസ്ഥര്ക്ക് നിര്ദേശം നല്കി.
ജില്ലാ പഞ്ചായത്ത് വീഡിയോ കോണ്ഫറന്സ് ഹാളില് നടന്ന യോഗത്തില് വൈസ് പ്രസിഡന്റ് പി.പി ദിവ്യ, സ്റ്റാന്റിംഗ് കമ്മിറ്റി അധ്യക്ഷന്മാരായ കെ.പി.ജയബാലന്, വി.കെ.സുരേഷ് ബാബു, ടി.ടി.റംല, കെ.ശോഭ, പ്ലാന് കോഡിനേറ്റര് കെ.വി.ഗോവിന്ദന്, സെക്രട്ടറി ഇന് ചാര്ജ് വി.കെ.രാജന്, ജില്ലാ പഞ്ചായത്ത് അംഗങ്ങള് തുടങ്ങിയവര് സംസാരിച്ചു.
