ചാലക്കുടി: മേലൂര് പഞ്ചായത്ത് ഭരണ സമിതി യോഗത്തില് നിന്ന് ബിജെപി അംഗങ്ങള് ഇറങ്ങി പോക്ക് നടത്തി. കേരള സര്ക്കാര് പദ്ധതി പ്രകാരം രൂപീകരിച്ച മേലൂര് സ്പോര്ട്സ് അക്കാദമിയുടെ നേതൃത്വത്തില് നടക്കുന്ന അഖില കേരള ഫുട്ബോള് മത്സരത്തിന്റെ സംഘാടക സമിതികളില് നിന്ന് ബിജെപി വാര്ഡ് മെമ്പര്മാരേയും, പ്രമുഖ രാഷ്ട്രീയ പാര്ട്ടികളേയും ഒഴിവാക്കിയതില് പ്രതിഷേധിച്ചായിരുന്നു ഇറങ്ങിപ്പോക്ക്.
ഭരണ സമതിയുടെ തീരുമാനത്തിനെതിരെ മൂന്നാം വാര്ഡ് മെമ്പര് ശ്രീദേവി ജയന്, അഞ്ചാം വാര്ഡ് മെമ്പര് അംബിക ബാബു എന്നിവര് അടിയന്തിര പ്രമേയത്തിന് അനുമതി ആവശ്യപ്പെട്ടെങ്കിലും അനുവദിച്ചില്ല. ഇതിനെ തുടര്ന്നാണ് പഞ്ചായത്ത് യോഗത്തില് നിന്ന് ഇരുവരും ഇറങ്ങി പോയത്. ഇതിന് മുമ്പ് കുടുംബശ്രീയുടെ അടക്കമുള്ള പല പരിപാടികളിലും ബിജെപിയംഗങ്ങളെ ഒഴിവാക്കിയതില് പ്രതിഷേധിച്ച് ശക്തമായ സമര പരിപാടികള് ബിജെപി പഞ്ചായത്ത സമിതി സംഘടിപ്പിച്ചിരുന്നു.
ബിജെപിയേയും,ജനപ്രതിനിധികളേയും നിരന്തരമായി ഒഴിവാക്കുന്ന ഭരണ സമിതിക്കെതിരെ ശക്തമായ സമരപരിപാടികള്ക്ക് രൂപം നല്കുവാന് ബിജെപി പഞ്ചായത്ത് സമിതി യോഗം തീരുമാനിച്ചു. പ്രസിഡന്റ് പി.ആര്.ശിവപ്രസാദ് അദ്ധ്യക്ഷത വഹിച്ചു. ജനറല് സെക്രട്ടറി ഷാജു കോക്കാടന്, മെമ്പര്മാരായ അംബിക ബാബു, ശ്രീദേവി ജയന്,പി.ആര്.രാമദാസ്, പി.ആര്.ഗംഗാധരന് എന്നിവര് സംസാരിച്ചു.
