മലപ്പുറം: കേന്ദ്രസര്ക്കാര് അനുവദിച്ച റേഷന് വിഹിതം പോലും വിതരണം ചെയ്യാത്ത സംസ്ഥാന സര്ക്കാര് നിലപാടില് പ്രതിഷേധിച്ച് യുവമോര്ച്ച ജില്ലയിലെ നാല് താലൂക്ക് സപ്ലൈ ഓഫീസിലേക്ക് മാര്ച്ച് നടത്തി. റേഷന് വിതരണം ഉടന് ആരംഭിക്കുക, പുതുക്കിയ റേഷന് കാര്ഡ് ലഭ്യമാക്കുക, മുന്ഗണനാ പട്ടിക പുറത്തുവിടുക തുടങ്ങിയ ആവശ്യങ്ങളുന്നയിച്ചായിരുന്നു സമരം.
റേഷന് പ്രതിസന്ധി സൃഷ്ടിച്ച് മോദി സര്ക്കാരിനെതിരെ രാഷ്ട്രീയ മുതലെടുപ്പ് നടത്താന് എല്ഡിഎഫ് ആസൂത്രിത ശ്രമം നടത്തുന്നതായി ബിജെ ജില്ലാ ജനറല് സെക്രട്ടറി രവിതേലത്ത് പറഞ്ഞു. പൊന്നാനി താലൂക് സപ്ലൈ ഓഫീസ് മാര്ച്ച് ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ രണ്ട് വര്ഷത്തിലധികമായി ഭക്ഷ്യഭദ്രത നിയമം നടപ്പിലാക്കാതെ സാധാരണക്കാരെ ദ്രോഹിക്കുന്ന ഏക സംസ്ഥാനമാണ് കേരളം. റേഷന് അര്ഹരായവരുടെ കുറ്റമറ്റ ലിസ്റ്റ് കേന്ദ്രത്തിന് ഇതുവരെ നല്കാതെയാണ് ഇടതുപക്ഷവും കോണ്ഗ്രസ്സും മോദി സര്ക്കാരിനെ കുറ്റപ്പെടുത്തുന്നത്. കഴിഞ്ഞ രണ്ടര വര്ഷമായി അവധി വാങ്ങി ഉഴപ്പുകയാണ് കഴിഞ്ഞ സര്ക്കാരും ഈ സര്ക്കാരും ചെയ്യുന്നത്. അനുവദിച്ച അരി ഗോഡൗണില് നിന്നും ഏറ്റെടുത്ത് വിതരണം ചെയ്യാന് തയ്യാറാവാത്തത് കുറ്റകരമായ അനാസ്ഥയാണെന്നും അദ്ദേഹം കൂട്ടിച്ചേര്ത്തു.
തിരൂര് മുന്സിപ്പല് സ്റ്റേഡിയത്ത് നിന്നും ആരംഭിച്ച മാര്ച്ച് സപ്ലൈ ഓഫീസിന് മുന്നില് പോലീസ് തടഞ്ഞു. യുവമോര്ച്ച ജില്ലാ ജനറല് സെക്രട്ടറി കെ.ടി.അനില്കുമാര് ഉദ്ഘാടനം ചെയ്തു. ജില്ലാ സെക്രട്ടറി സൂരജ് ചേങ്ങാട് അദ്ധ്യക്ഷനായി. സുനില് പരിയാപുരം മുഖ്യപ്രഭാഷണം നടത്തി. താനൂര് മണ്ഡലം പ്രസിഡന്റ് പ്രിയേഷ് കാര്ക്കോളി സ്വാഗതവും തിരൂര് മണ്ഡലം പ്രസിഡന്റ് രതീഷ് ചെമ്പ്ര നന്ദിയും പറഞ്ഞു.
നിലമ്പൂരില് സംസ്ഥാന സെക്രട്ടറി അജി തോമസ് ഉദ്ഘാടനം നിര്വഹിച്ചു. സുധീഷ് അമരമ്പലം അദ്ധ്യക്ഷനായി. സുധീഷ് ഉപ്പട, ശ്രീനാഥ് കോട്ടപ്പാടം, ജിതിന് കീഴേടത്ത്, ജിത്തു എടക്കര എന്നിവര് സംസാരിച്ചു.
തിരൂരങ്ങാടിയിലെ മാര്ച്ച് ബിജെപി സംസ്ഥാന സമിതിയംഗം ജഗന്നിവാസന് ഉദ്ഘാടനം ചെയ്തു. യുവമോര്ച്ച ജില്ലാ വൈസ് പ്രസിഡന്റ് റിജു.സി.രാഘവ് അദ്ധ്യക്ഷനായി. മണ്ഡലം സെക്രട്ടറിമാരായ സുബിന് ഷാ സ്വാഗതവും ശ്രീഹരി നന്ദിയും പറഞ്ഞു.
