എടപ്പാള്: തവനൂര് മണ്ഡലത്തില് സിപിഎം നടത്തുന്ന അക്രമങ്ങള്ക്ക് പ്രോത്സാഹനം നല്കുന്നത് എംഎല്എ കൂടിയായ മന്ത്രി കെ.ടി.ജലീലും പ്രാദേശിക നേതാക്കളുമാണെന്ന് ബിജെപി ജില്ലാ ജനറല് സെക്രട്ടറി രവി തേലത്ത് കുറ്റപ്പെടുത്തി. കഴിഞ്ഞ ദിവസം സിപിഎമ്മുകാര് ക്രൂരമായി മര്ദ്ദിച്ച ബിജെപി എടപ്പാള് പഞ്ചായത്ത് കമ്മറ്റി സെക്രട്ടറി അശോകന് പൊറൂക്കരയെ ആശുപത്രിയില് സന്ദര്ശിച്ചശേഷം സംസാരിക്കുകയായിരുന്നു അദ്ദേഹം. ജനപ്രതിനിധി തന്നെ അക്രമങ്ങള്ക്ക് പ്രോത്സാഹനം നല്കുന്നത് പ്രതിഷേധാര്ഹമാണ്. സംഘപരിവാര് കേരളത്തില് മുമ്പില്ലാത്ത വിധം ശക്തിയാര്ജ്ജിക്കുകയാണെന്നും മുളയിലേനുള്ളിയില്ലെങ്കില് അപകടമാണെന്നും ഡിവൈഎഫ്ഐ സമ്മേളനത്തില് ജലീല് പ്രസംഗിച്ചത് അക്രമത്തിനുള്ള ആഹ്വാനമായിരുന്നെന്ന് ഇപ്പോള് വ്യക്തമായി. അദ്ദേഹം കൂട്ടിച്ചേര്ത്തു.
ജില്ലാ വൈസ് പ്രസിഡന്റ് കെ.പി.മാധവന്, മണ്ഡലം പ്രസിഡന്റ് രാജീവ് കല്ലംമുക്ക്, വൈസ് പ്രസിഡന്റ് സുബ്രഹ്മണ്യന് തറക്കല്, യുവമോര്ച്ച ജില്ലാ സെക്രട്ടറി മണികണ്ഠന്, കര്ഷകമോര്ച്ച സംസ്ഥാന കമ്മറ്റി അംഗം പ്രേമന്കുട്ടത്ത്, രതീഷ് പൊന്നാഴിക്കര എന്നിവരും അദ്ദേഹത്തോടൊപ്പം ഉണ്ടായിരുന്നു.
