തിരുവനന്തപുരം : മഹാത്മാഗാന്ധി സര്വ്വകലാശാല കലോത്സവം ശിവരാത്രി ദിനം ഒഴിവാക്കി നിശ്ചയിക്കണമെന്ന് ഹിന്ദുഐക്യവേദി സംസ്ഥാന ജനറല് സെക്രട്ടറി ഇ.എസ്. ബിജു ആവശ്യപ്പെട്ടു. പിതൃതര്പ്പണദിനം കൂടിയായ ശിവരാത്രി ഹിന്ദുക്കള്ക്ക് വളരെ പ്രാധാന്യമുള്ളതും വ്രതധാരണത്തോടെ ഉറക്കമിളച്ച് ആചരിക്കുന്നതുമാണ്.
മത്സരാര്ത്ഥികള്, രക്ഷിതാക്കള്, സംഘാടകരായ ഉദ്യോഗസ്ഥര്, അദ്ധ്യാപകര് എന്നിവരില് ഭൂരിപക്ഷം പേരും പിതൃതര്പ്പണത്തിലും ആചരണങ്ങളിലും പങ്കെടുക്കേണ്ടവരാണ്. കലോത്സവ സമാപന ദിനം ശിവരാത്രിദിനമായ ഫെബ്രുവരി 24ന് നിശ്ചയിച്ചതിലൂടെ ആചരണങ്ങളില് പങ്കെടുക്കുവാനുള്ള സാഹചര്യം നിഷേധിക്കുകയാണ്. ഹിന്ദു വിശേഷ ദിവസങ്ങള്ക്കു പ്രാധാന്യം നിഷേധിക്കുന്ന സര്ക്കാര് നിലപാട് പ്രതിഷേധാര്ഹമാണ്. ഹിന്ദു വിരുദ്ധ നിലപാടുകള് സര്ക്കാരും വിദ്യാഭ്യാസ വകുപ്പും അവസാനിപ്പിക്കണം. ശിവരാത്രി ദിനമൊഴിവാക്കി കലോത്സവ മത്സരങ്ങളും സമാപനവും നിശ്ചയിക്കണമെന്നാവശ്യപ്പെട്ട് വിദ്യാഭ്യാസ മന്ത്രിക്കും വൈസ് ചാന്സലര്ക്കും ഹിന്ദുഐക്യവേദി നിവേദനം സമര്പ്പിക്കും. കലോത്സവ തീയതി പുനര്നിശ്ചയിക്കാത്ത പക്ഷം ഹിന്ദു ഐക്യവേദി പ്രക്ഷോഭ പരിപാടികള്ക്ക് നേതൃത്വം നല്കുമെന്നും ഇ.എസ്. ബിജു പറഞ്ഞു.
