തിരുവനന്തപുരം: ക്ഷയശ്വാസകോശ രോഗങ്ങളുടെ നിര്മാര്ജ്ജനത്തിനായി ആരോഗ്യവകുപ്പിന്റെ ശ്വാസ്, 99 ഡോട്സ് പദ്ധതികള്ക്ക് തുടക്കമായി. ആരോഗ്യമന്ത്രി കെ.കെ ശൈലജ പദ്ധതികള് ഉദ്ഘാടനം ചെയ്തു. 2020 ഓടെ സമ്പൂര്ണ ക്ഷയരോഗ രഹിത സംസ്ഥാനമാണ് ലക്ഷ്യമിടുന്നതെന്ന് മന്ത്രി പറഞ്ഞു.
ക്ഷയരോഗ നിര്മ്മാര്ജ്ജനത്തിനായുള്ള ഡോട്സ് പദ്ധതിയുടെ ഫലപ്രദമായ നടത്തിപ്പാണ് 99 ഡോട്സ് എന്ന മൊബൈല് ആപ്പ് പദ്ധതിയിലൂടെ ലക്ഷ്യമിടുന്നത്. രോഗികള് കൃത്യമായി മരുന്നു കഴിക്കുന്നുണ്ടോയെന്ന് ഡോക്ടര്മാര്ക്ക് തങ്ങളുടെ കമ്പ്യൂട്ടര് വഴി അറിയാനാകും. തങ്ങള്ക്ക് ലഭിക്കുന്ന ടാബ്ലറ്റിനുള്ളിലുള്ള രഹസ്യ കോഡ് രോഗികള് മൊബൈല് ആപ്പില് രേഖപ്പെടുത്തുന്നതോടെ അതത് ഡോക്ടര്മാരുടെ കമ്പ്യൂട്ടറുകളിലേക്ക് വിവരമെത്തും. ഇങ്ങനെ ഫീല്ഡില് പോകാതെ തന്നെ രോഗികള് മരുന്നു കഴിക്കുന്നത് നിരീക്ഷിക്കാനാകും. രോഗികള് കോഡ് മൈബൈല് വഴി അയയ്്്ക്കണമെന്ന് മാത്രം. ഏറ്റവും ചെലവുകുറഞ്ഞ നിരീക്ഷണ സംവിധാനവുമാണിത്.
ശ്വാസകോശ സംബന്ധമായ അസുഖങ്ങള് കണ്ടെത്തുന്നതിനും പ്രതിരോധനടപടികള് സ്വീകരിക്കുന്നതിനുമുള്ള പദ്ധതിയാണ് ശ്വാസ്. വായുമലിനീകരണമാണ് കൂടുതലായും ശ്വാസകോശ രോഗങ്ങള്ക്കിടയാക്കുന്നത്. മലിനീകരണത്തിനെതിരെ ബോധവത്ക്കരണവും മലിനീകരണം ഇല്ലാതാക്കുന്നതിന് ശാസ്ത്രീയനടപടികളുമാണ് പദ്ധതിയിലൂടെ ലക്ഷ്യമിടുന്നത്. ക്ഷയരോഗ നിര്മ്മാര്ജ്ജനത്തിനായി ആരോഗ്യവകുപ്പ് ഐക്യരാഷ്ട്രസഭയുമായി ചേര്ന്ന് തിരുവനന്തപുരത്ത് നടക്കുന്ന ദ്വിദിന സെമിനാര് വേദിയിലാണ് പുതിയ പദ്ധതികള് ഉദ്ഘാടനം ചെയ്തത്.
