പയ്യന്നൂര്: ഏകക്ഷേത്ര ദര്ശനത്തിലൂടെ നാലമ്പലദര്ശന സായൂജ്യം. ഹനുമല് സന്നിധിയിലെത്തുന്ന വിശ്വാസികളുടെ ആത്മനിര്വൃതിയാണിത്. ചെറുതാഴം രാഘവപുരം ക്ഷേത്രം എന്ന പേരില് ഉത്തരകേരളത്തില് പ്രസിദ്ധമായ ഈ രാമായണ സങ്കേതത്തില് ഇനി ഏഴു നാളുകള് ഉത്സവരാപ്പകലുകളാണ്. ത്രേതായുഗത്തില് ലക്ഷ്മണാദികളെ പുനരുജ്ജീവിപ്പിക്കാനായി നടത്തിയ ഔഷധാഗരണ വേളയില്, ഹനുമാന് സ്വാമിയുടെ മനസ്സാന്നിധ്യവും ശ്രീരാമസ്വാമിയുടെ ചൈതന്യ പ്രഭാവവും രൂഢമൂലമായ സാന്നിധ്യ വിശേഷങ്ങളെ കണ്ടറിഞ്ഞ ഭാര്ഗ്ഗവരാമന് തൃക്കൈ കൊണ്ട് പ്രതിഷ്ഠ ചെയ്ത പുണ്യഭൂമിയാണിത്. തന്റെ പേരിനേക്കാള് ഭക്തന്റെ പേരില് ഹനുമാരമ്പലം എന്ന് പ്രസിദ്ധമായ ഇവിടെ ശ്രീരാമ ഭഗവാനോടൊപ്പം ഹനുമാന് സ്വാമിയേയും ആരാധിക്കുന്നു. പരമശിവന്, ദുര്ഗ്ഗ ആരാധനാമൂര്ത്തികളും പ്രത്യേക ശ്രീകോവിലുകളില് കുടികൊള്ളുന്നു.
സീതാലക്ഷ്മണ സമേതനായ ശ്രീരാമസ്വാമിയുടെ പ്രഭാവം കൊണ്ടും ഭരത ശത്രുഘ്ന സ്വാമികളുടെ മനസ്സാന്നിധ്യം കൊണ്ടും ഇവിടെത്തെ ആരാധനതൊഴല് നാലമ്പല ദര്ശന തുല്യമെന്ന് വിശ്വസിച്ചു പോരുന്നു. ഇവിടുത്തെ ഹനുമല് സ്വാമിക്കുള്ള അവില് നിവേദ്യം അമ്പലപ്പുഴ പാല്പായസം പോലെ ദേശദേശാന്തരങ്ങളില് പ്രസിദ്ധമാണ്.
കോലത്തിരി രാജാവ് ഉദയവര്മ്മന് ഗോകര്ണ്ണത്തു നിന്നും സ്വീകരിച്ച് കൊണ്ടുവന്ന 237 വൈജ്ഞാനിക ബ്രാഹ്മണ കുടുംബങ്ങള്ക്ക് സഭാ യോഗക്ഷേത്രമെന്ന നിലയില് പണികഴിപ്പിച്ച് നല്കിയതാണ് വലിയമ്പലം എന്ന ഈ ക്ഷേത്ര സാങ്കേതമെന്ന് ഉദയവര്മ്മ ചരിതം, കോല രാഷ്ട്ര വര്ണ്ണന തുടങ്ങിയ ഗ്രന്ഥങ്ങളില് പറയുന്നു.
വൈഷ്ണവ ശൈവ ചൈതന്യങ്ങളുടെ സംഗമഭൂമിയാണ് ഈ സന്നിധി.സര്വ്വ മംഗള കാരിണിയായ സീതാദേവിയുടെ സാന്നിധ്യം കുടുംബിനികള്ക്ക് നെടുമാംഗല്യത്തിനും സന്താന സൗഭാഗ്യത്തിനും വിശിഷ്ടമാണെന്നാണ് വിശ്വാസം.
ഫെബ്രുവരി മൂന്നിന് കൊടിയേറി ഏഴു ദിനങ്ങള് നീളുന്ന ഇവിടത്തെ ഉത്സവങ്ങളും ഏറെ വൈവിധ്യങ്ങള് നിറഞ്ഞതാണ്. പഞ്ചവാദ്യമേള സഹിതം നാല് ഗജവീരന്മാരുടെ അകമ്പടിയില് ദിവസവും വൈകീട്ട് അഞ്ചിന് നടക്കുന്ന കാഴ്ചശീവേലിയും തുടര്ന്ന് നാല് ദേവ നര്ത്തകരുടെ ഒരേ താളത്തിലുള്ള തലയില് തിടമ്പേറ്റിയുള്ള നൃത്തവും അത്യപൂര്വ്വ കാഴ്ചയാണ്. ചെറുതാഴത്തിന് ഭക്തിയുടെ ലഹരി പകര്ന്നും കലാവിരുന്ന് ഒരുക്കിയും ആഘോഷ തിമര്പ്പില് ആറാടിക്കുന്ന ദേശത്തിന്റെ ഉത്സവം പത്തിന് ആയിരങ്ങള്ക്ക് ആറാട്ട് സദ്യ വിളമ്പിയാണ് കൊടിയിറങ്ങുന്നത്.
