പയ്യന്നൂര്: മഴക്കുറവുമൂലം പുഞ്ചകൃഷിക്കുണ്ടായ വ്യാപക നാശം ഗ്രാമങ്ങളിലെ നെല്ലുല്പാദനത്തെ കാര്യമായി ബാധിക്കും. പ്രധാന പാടശേഖരങ്ങളിലെല്ലാം വിരിഞ്ഞതും വിരിയാറായതുമായ നെല്ച്ചെടികള് പഴുത്തും ഉണങ്ങിയും നശിക്കുകയാണ്. ചെറുതാഴം, കടന്നപ്പള്ളി, കോറോം, കുഞ്ഞിമംഗലം, എരമം, രാമന്തളി വില്ലേജുകളിലെ മിക്ക വയലുകളിലും പുഞ്ചക്കൃഷിയെ വരള്ച്ച ബാധിച്ച നിലയിലാണ്. വെള്ളം തീരെയില്ലാതെ വരണ്ട ഭാഗങ്ങളില് ചെടി വിരിയാതെയും വിരിഞ്ഞത് നെല്മണികള് കുറഞ്ഞുമാണ്. വെള്ളം പമ്പ് ചെയ്ത് ജലസേചനം നടത്തുന്ന വയലുകളിലും താഴ്ന്ന പ്രദേശത്തുള്ള കൃഷിയിടങ്ങളിലുമാണ് അല്പം ഭേദപ്പെട്ട നെല്ലുള്ളത്. കൃഷി വരണ്ട് നെല്ച്ചെടികള് ഉണങ്ങിയ ഇടങ്ങളില് അവ അരിഞ്ഞ് കന്നുകാലികള്ക്കുള്ള വൈക്കോലാക്കുകയാണ് കര്ഷകര്.
ഉല്പാദനച്ചെലവും താളം തെറ്റിയ മഴയും ഉല്പാദനക്കുറവും കൊണ്ട് ഒന്നാം വിള പേരിന് മാത്രം നടത്തുന്ന വയലുകളാണ് ഇവയിലേറെയും. രണ്ടാം വിള പുഞ്ചകൃഷിയിലാണ് നല്ല ഉല്പ്പാദനമുണ്ടാകുക പതിവ്. എന്നാല് ഈ വര്ഷം കാലവര്ഷം കുറഞ്ഞതും തുലാവര്ഷം പേരിന് മാത്രം ആയതും പ്രധാന നെല്വയലുകളെ കടുത്ത വരള്ച്ചക്ക് ഇടയാക്കി. വിത്തും ചെലവും പോലും കിട്ടാത്ത നിലയിലാണ് കര്ഷകര്. നെല്കൃഷി പ്രധാന ഉപജീവനമാക്കിയ പല കര്ഷകരെയും പുഞ്ചകൃഷിയിലെ നഷ്ടം കടക്കെണിയിലാക്കുന്ന സ്ഥിതിയാണ്. പുഞ്ചകൃഷിക്കുണ്ടായ വ്യാപക നാശം പരിഗണിച്ച് സര്ക്കാര് അര്ഹമായ നഷ്ട പരിഹാരം ലഭ്യമാക്കും എന്ന പ്രതീക്ഷയിലാണ് കര്ഷകര്.
