കൊച്ചി: ആത്മ സമര്പ്പണം കൊണ്ട് ലോകത്തെ നന്മയിലേക്ക് നയിക്കാനാകുമെന്ന് ചിന്മയ മിഷന് ആഗോള അദ്ധ്യക്ഷന് സ്വാമി സ്വരൂപാനന്ദ. മനസിന്റെ ആത്മ സമര്പ്പണമാണ് പ്രധാനം. അര്ജുനന് അസ്ത്രവിദ്യയില് നിപുണനായത് ഈ ആത്മ സമര്പ്പണം മൂലമാണ്. വിശ്വസിക്കുന്ന ഒന്നിനോടുള്ള അചഞ്ചലമായ വിശ്വാസവും പ്രയത്നവും ഏതൊരാളേയും ഏതു രംഗത്തും മുന്നിലെത്തിക്കുമെന്ന് സ്വാമി പറഞ്ഞു. ചിന്മയ മിഷന് എജ്യൂക്കേഷനല് ആന്ഡ് കള്ച്ചറല് ട്രസ്റ്റും എറണാകുളം ചിന്മയ മിഷനും ചേര്ന്ന് ടിഡിഎം ഹാളില് നല്കിയ സ്വീകരണയോഗത്തില് പ്രഭാഷണം നടത്തുകയായിരുന്നു അദ്ദേഹം.
ബുദ്ധിയും പ്രയത്നവും കഠിനാധ്വാനവുമാണ് മികവിലെത്തിക്കുന്നത്. മികവിനെ മറികടക്കുകയെന്നതാണ് ഇന്നു പ്രധാനം. ജന്മസിദ്ധമായ കഴിവുകളോടെയാണ് ഏതൊരാളും പിറന്നുവീഴുന്നത്. പ്രകൃതി ആ കഴിവുകള് വളര്ത്തിയെടുക്കുന്നതിനു സാഹചര്യമൊരുക്കുന്നു. ആത്മവിശ്വാസം ഇല്ലാതാകുന്നതാണ് ഇന്നു കാണുന്ന ന്യൂനതയെന്ന് സ്വാമി പറഞ്ഞു.
ചിന്മയ മിഷന് കേരള മേധാവി സ്വാമി വിവിക്താനന്ദ സരസ്വതി അധ്യക്ഷത വഹിച്ചു. ഹൈബി ഈഡന് എംഎല്എ, സ്വാമി സത്യാനന്ദ സരസ്വതി, സ്വാമി അദ്വയാനന്ദ സരസ്വതി, ചിന്മയ മിഷന് എജ്യൂക്കേഷനല് ആന്ഡ് കള്ച്ചറല് ട്രസ്റ്റ് ചീഫ് സേവകുമാരായ എ. ഗോപാലകൃഷ്ണന്, കെ.കെ. രാജന്, സേവാ ട്രസ്റ്റ് ചീഫ് സേവക് സുരേഷ് മോഹന് എന്നിവര് പ്രസംഗിച്ചു.
