കണ്ണൂര്‍: പ്ലാസ്റ്റിക് വിമുക്ത കണ്ണൂര്‍ – നല്ല മണ്ണ് നല്ല നാട് കാംപയിന്റെ ഭാഗമായി പ്ലാസ്റ്റിക് കാരിബാഗുകള്‍ക്കെതിരായ സന്ദേശവുമായി ആരോഗ്യ വകുപ്പ് മന്ത്രി കെ.കെ.ശൈലജ സൂപ്പര്‍ മാര്‍ക്കറ്റ് സന്ദര്‍ശിച്ചു. കണ്ണൂര്‍ നഗരത്തിലെ ഗ്രീന്‍സ് സൂപ്പര്‍മാര്‍ക്കറ്റാണ് റിപ്പബ്ലിക് ദിനത്തില്‍ മന്ത്രി സന്ദര്‍ശിച്ചത്. ജില്ലാ കലക്ടര്‍ മീര്‍ മുഹമ്മദലി, ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാന്റിങ്ങ് കമ്മിറ്റി ചെയര്‍മാന്‍ കെ.പി.ജയബാലന്‍ എന്നിവരും മന്ത്രിക്കൊപ്പമുണ്ടായിരുന്നു.
പ്ലാസ്റ്റിക് ബാഗുകള്‍ക്ക് പകരം കൈത്തറിതുണിയില്‍ ഉണ്ടാക്കിയ വിവിധ തരം കാരിബാഗുകളാണ് സൂപ്പര്‍മാര്‍ക്കറ്റുകളിലും ഹൈപ്പര്‍മാര്‍ക്കറ്റുകളിലും വിതരണം ചെയ്യുന്നത്. ജില്ലയിലെ 50ലേറെ സൂപ്പര്‍-ഹൈപ്പര്‍-മിനി മാര്‍ക്കറ്റുകള്‍ ജനുവരി 26 മുതല്‍ പ്ലാസ്റ്റിക് കാരി ബാഗില്‍ സാധനങ്ങള്‍ വിതരണം ചെയ്യില്ലെന്ന് പ്രഖ്യാപിച്ചിരുന്നു. പ്ലാസ്റ്റിക നിര്‍മാര്‍ജനത്തിനായി തികച്ചും മാതൃകാപരമായ പ്രവര്‍ത്തനമാണ് കണ്ണൂര്‍ ജില്ലയില്‍ നടക്കുന്നതെന്ന് മന്ത്രി ശൈലജ ടീച്ചര്‍ അഭിപ്രായപ്പെട്ടു. പരിസ്ഥിതി സംരക്ഷണത്തിന് മാത്രമല്ല, ജനങ്ങളുടെ ആരോഗ്യ സംരക്ഷണത്തിനും പ്ലാസ്റ്റിക് ഉപയോഗം ഒഴിവാക്കുന്ന പ്രവര്‍ത്തനം സഹായകമാകുമെന്ന് അവര്‍ പറഞ്ഞു.
ഏപ്രില്‍ രണ്ടോടെ ജില്ലയെ പ്ലാസ്റ്റിക് കാരിബാഗ്- ഡിസ്‌പോസബ്ള്‍സ് വിമുക്തമാക്കുകയെന്ന ലക്ഷ്യവുമായി ജില്ലാ പഞ്ചായത്തിന്റെയും ജില്ലാഭരണത്തിന്റെയും നേതൃത്വത്തില്‍ ആരംഭിച്ച നല്ലമണ്ണ്, നല്ല നാട് ക്യാമ്പയിന്റെ ഭാഗമായാണ് സൂപ്പര്‍മാര്‍ക്കറ്റുകളില്‍ പ്ലാസ്റ്റിക് കാരിബാഗില്‍ സാധനങ്ങള്‍ വിതരണം ചെയ്യുന്നത് നിര്‍ത്തിയത്. പല തദ്ദേശ സ്വയം ഭരണ സ്ഥാപനങ്ങളും ഇതിനകം പ്ലാസ്റ്റിക് വിമുക്ത പ്രഖ്യാപനം നടത്തിക്കഴിഞ്ഞു.
കഴിഞ്ഞ ഗാന്ധി ജയന്തി ദിനത്തില്‍ മാത്രം നഗരത്തിലെ 12 സൂപ്പര്‍ മാര്‍ക്കറ്റുകള്‍ കാരി ബാഗുകള്‍ നല്‍കാതിരുന്നപ്പോള്‍ 54,000 പ്ലാസ്റ്റിക് ബാഗുകളാണ് ഒഴിവാക്കാനായത്. തദ്ദേശ സ്വയം ഭരണസ്ഥാപനങ്ങളില്‍ ഈ കാംപയിനുമായി ബന്ധപ്പെട്ട് മാതൃകാപരമായ പ്രവര്‍ത്തനങ്ങളാണ് നടക്കുന്നത്. ജില്ലയില്‍ ഇതിനകം 70 ലേറെ മാലിന്യമില്ലാ മംഗല്യങ്ങള്‍ നടന്നു. സ്‌കൂളുകള്‍ വഴി പ്ലാസ്റ്റിക് ശേഖരിച്ച് സംസ്‌കരണ കേന്ദ്രങ്ങളിലേക്കയക്കുന്ന കലക്‌ടേഴ്‌സ് അറ്റ് സ്‌കൂള്‍ പദ്ധതിയും നല്ല രീതിയില്‍ പുരോഗമിക്കുകയാണ്.
