തിരുവനന്തപുരം : പൂജപ്പുര മൈതാനിയില് ഇന്ന് വൈകിട്ട് 4.30ന് കുട്ടികളുടെ യോഗത്തോണ് നടക്കും. ശ്രീകൃഷ്ണ യോഗത്തോണ് എന്ന് പേരിട്ടിരിക്കുന്ന പരിപാടിയില് ജില്ലയിലെ വിവിധ സ്കൂളുകളില് നിന്നുള്ള ആയിരം വിദ്യാര്ത്ഥികള് ഒരുമിച്ച് യോഗാഭ്യാസം നടത്തും. 6 മണി വരെ ചടങ്ങുകള് നീണ്ടു നില്ക്കും. രാജീവ് നാഥ്, വിജിതമ്പി, ചിന്മയാമിഷന് ചീഫ് സേവക് സുരേഷ് മോഹന്, ജി. ശങ്കര് തുടങ്ങിയവര് പങ്കെടുക്കും.
27ന് വൈകിട്ട് 4ന് ഗാന്ധിപാര്ക്കില് ആയിരം പെണ്കുട്ടികള് പങ്കെടുക്കുന്ന ഭാരതീയ ഗാനത്തോണും നടക്കും. വിവിധ ഭാഷകളിലെ ദേശഭക്തിഗാനങ്ങളാണ് കുട്ടികള് ആലപിക്കുക.29ന് രാവിലെ 11 ന് മ്യൂസിയം കോമ്പൗണ്ടില് കുട്ടികള്ക്കായി പെയിന്റിംഗ് മത്സരവും സംഘടിപ്പിച്ചിട്ടുണ്ട്. ആയിരം കുട്ടികള് മത്സരത്തില് പങ്കെടുക്കും. വനം-വന്യജീവി സംരക്ഷണം, സന്തുലിത പരിസ്ഥിതി, പ്രകൃതി പരിപാലനം, കുടുംബം, മാനുഷിക മൂല്യങ്ങളെ വളര്ത്തല്, സ്ത്രീകളെ ബഹുമാനിക്കല്, ദേശഭക്തി വളര്ത്തല് തുടങ്ങിയ വിഷയങ്ങളെ അധികരിച്ചാവും മത്സരങ്ങളും പരിപാടികളും നടത്തുക.
ഹിന്ദു ആദ്ധ്യാത്മിക സേവന മേളയുടെ മുന്നോടിയായാണ് പരിപാടികള് നടത്തുന്നത്. ഇതോടനുബന്ധിച്ച് ജനുവരി 12ന് ആരംഭിച്ച സ്വാമി വിവേകാനന്ദന്റെ ചിത്രവുമായുള്ള വിവേകാനന്ദ രഥയാത്ര നൂറു സ്കൂളുകളിലെ സ്വീകരണത്തിന് ശേഷം ഇന്ന് പൂജപ്പുരയില് സമാപിക്കും.
ഫെബ്രുവരി രണ്ടു മുതല് അഞ്ചു വരെ പൂജപ്പുര മൈതാനിയില് ഹിന്ദു ആദ്ധ്യാത്മിക സേവനമേള നടക്കും. ശ്രീരാമകൃഷ്ണ മിഷന്, ചിന്മയ മിഷന്, അമൃതാനന്ദമയി മഠം, സേവാ ഭാരതി തുടങ്ങി ഹിന്ദു-ആദ്ധ്യാത്മിക സംഘടനകളുടെ സേവന പദ്ധതികളെക്കുറിച്ചുള്ള പ്രദര്ശനങ്ങളാണ് മേളയിലുണ്ടാവുക.
