എടത്വാ: ദേവസ്വം ബോര്ഡ് ക്ഷേത്രത്തില് സ്ഥിരനിയമന ഉത്തരവ് ലഭിച്ചിട്ടും വൈകിക്കുന്നതായി പരാതി. തകഴി ചിറയകം കളത്തില് പ്രമീള കുമാരിയാണ് പരാതിയുമായി രംഗത്തുവന്നത്. തിരുവിതാംകൂര് ദേവസ്വം ബോര്ഡിന്റെ കീഴിലുള്ള തലവടി ശ്രീഗണപതി ക്ഷേത്രത്തില് താല്കാലിക ജീവനക്കാരിയായി ജോലി നോക്കിയിരുന്ന പ്രമീളകുമാരിയാണ് സ്ഥിരനിയമന ഉത്തരവ് ലഭിച്ചിട്ടും അധികൃതര് വൈകിപ്പിക്കുന്നതായി പരാതി നകിയത്.
2004 ജൂണില് താല്കാലിക ജീവനക്കാരിയായി ക്ഷേത്രത്തിലെ തളിക്കല് ജോലിയില് പ്രവേശിച്ച പ്രമീളകുമാരിയെ 2015ല് മുന്നറിയിപ്പില്ലാതെ പിരിച്ചുവിട്ടിരുന്നു. ക്ഷേത്രജീവനക്കാരിയായി തുടരുമ്പോള് താല്കാലിക ജീവനക്കാരുടെ സ്ഥിരം നീയമനലിസ്റ്റ് 2012ല് ദേവസ്വം ബോര്ഡ് പുറത്തിറക്കിയപ്പോള് പ്രമീള കുമാരിയും ലിസ്റ്റില് ഉള്പ്പെട്ടിരുന്നു. ദേവസ്വം ബോര്ഡ് നടപടി സ്വീകരിക്കാതെ വന്നതോടെ പരാതിക്കാരി സംസ്ഥാന മനുഷ്യാവകാശ കമ്മീഷനെ സമീപിച്ചു.
2016 നവംബര് 23ന് മനുഷ്യാവകാശ കമ്മീഷന് പ്രമീള കുമാരിക്ക് അനുകൂലമായി ഉത്തരവിറക്കി. പരാതിക്കാരിയുടെ പേര് സ്ഥിരം നിയമനത്തില് പരിഗണിക്കണമെന്നും, ജോലിചെയ്തിരുന്ന ക്ഷേത്രത്തില് നീയമനം നല്കണമെന്നുമായിരുന്നു ഉത്തരവ്. നീയമന നടപടിയെക്കുറിച്ച് രണ്ടുമാസത്തിനുള്ളില് കമ്മീഷനെ അറിയിക്കണമെന്ന് അമ്പലപ്പുഴ അസി. കമ്മീഷണറോട് ആവശ്യപ്പെട്ടിരുന്നു. നിയമനം വൈകിയതോടെ പരാതിക്കാരി അന്വഷിച്ചപ്പോള് തിരുവിതാംകൂര് ദേവസ്വം ബോര്ഡില് നിന്ന് അറിയിപ്പ് ലഭിച്ചിട്ടില്ലെന്നാണ് അസി. കമ്മീഷണര് അറിയിച്ചു.
പതിമൂന്ന് വര്ഷം ക്ഷേത്രത്തിലെ തളിക്കല് ജോലിചെയ്ത് ഉപജീവനം കഴിച്ചിരുന്ന വീട്ടമ്മയാണ് ബോര്ഡിന്റെ സ്ഥിരം നിയമനത്തിന് കാത്തിരിക്കുന്നത്. ബോര്ഡിന്റെ ഉത്തരവോടെ ജോലിയില് തിരികെ പ്രവേശിക്കാമെന്ന പ്രത്യാശയിലാണ് പ്രമീള കുമാരി.
