കോട്ടയം: റോഡപകടങ്ങളില്‍പ്പെടുന്നവര്‍ക്ക് മുന്‍കൂര്‍ പണമോ മറ്റ് രേഖകളോ ഇല്ലാതെ പണരഹിത ചികിത്സ ഉറപ്പാക്കാന്‍ കേന്ദ്ര സര്‍ക്കാരിന്റെ പിഎം റാഹത്ത് (റോഡ് ആക്‌സിഡന്റ് വിക്റ്റിം ഹോസ്പിറ്റലൈസേഷന്‍ ആന്‍ഡ് ഇന്‍ഷ്വേര്‍ഡ് ട്രീറ്റ്‌മെന്റ്) പദ്ധതി. ഒന്നരലക്ഷം രൂപയുടെവരെ ചികിത്സ സൗജന്യമായി ലഭിക്കും.
റോഡ് അപകടത്തില്‍പ്പെടുന്നവരുടെ ചികിത്സാ ചെലവ് വളരെ വലുതാണ്. മാത്രമല്ല പെട്ടെന്ന് ഉണ്ടാകുന്ന അപകടത്തില്‍ പരിക്കേല്‍ക്കുന്നവര്‍ പണം കണ്ടെത്താനും മികച്ച ചികിത്സ തേടാനും ഏറെ പ്രയാസപ്പെടും. റോഡ് അപകടത്തില്‍ പെട്ടെന്ന് ചികിത്സ കിട്ടിയാലും തുടര്‍ ചികിത്സക്ക് വലിയ പ്രതിസന്ധി നേരിടുന്നവര്‍ ഏറെയുണ്ടണ്ട്. വലിയ പണച്ചെലവാണെന്നതുതന്നെ പ്രധാന കാരണം. പരിക്കേല്‍ക്കുന്നവരെ പെട്ടെന്ന് ആശുപത്രിയിലെത്തിക്കാനും ഈ പദ്ധതിയില്‍ സംവിധാനമുണ്ട്.
അപകടം നടന്ന തീയതി മുതല്‍ പരമാവധി ഏഴ് ദിവസത്തേക്കുള്ള ചികിത്സയാണ് ഇതില്‍ ഉള്‍പ്പെടുത്തിയിരിക്കുന്നത്. റോഡിലുണ്ടാകുന്ന അപകടങ്ങളില്‍ പരിക്കേല്‍ക്കുന്നവര്‍ക്ക് അംഗീകൃത ആശുപത്രികള്‍ വഴി ഈ സേവനം ലഭ്യമാക്കുന്നു. സഹായം ലഭിക്കാന്‍ 112 എമര്‍ജന്‍സി റെസ്പോണ്‍സ് സപ്പോര്‍ട്ട് സിസ്റ്റവുമായി ബന്ധിപ്പിച്ചതിനാല്‍ ആംബുലന്‍സ് സേവനവും അടുത്തുള്ള ആശുപത്രിയുടെ വിവരങ്ങളും അറിയാന്‍ സാധിക്കുന്നു.
റോഡ് അപകടത്തില്‍പ്പെട്ട് ആശുപത്രികളില്‍ എത്തുന്നവരില്‍നിന്ന് മുന്‍കൂറായി പണം ഈടാക്കുന്നില്ല. മോട്ടോര്‍ വാഹന അപകട ഫണ്ട് വഴിയാണ് റീ ഇംബേഴ്സ്മെന്റുകള്‍ ഡിജിറ്റലായി അടക്കുന്നത്. പോലീസ് നിയന്ത്രിത വിശദമായ ഇലക്ട്രോണിക് അപകട റിപ്പോര്‍ട്ട് ദേശീയ ആരോഗ്യ അതോറിറ്റിയുടെ ഡിജിറ്റല്‍ പ്ലാറ്റ്ഫോമുകളുമായും ബന്ധിപ്പിക്കുന്നു. ഇതുകൊണ്ട് പോലീസ് വെരിഫിക്കേഷനും ആശുപത്രി ക്ലെയിം നടപടികളും വേഗത്തില്‍ നടക്കുകയും ഉറപ്പാക്കുകയും ചെയ്യുന്നു.
ആയുഷ്മാന്‍ ഭാരത് പ്രകാരം എംപാനല്‍ ചെയ്തവ ഉള്‍പ്പെടെ മിക്ക സര്‍ക്കാര്‍, സ്വകാര്യ ആശുപത്രികളും ഈ സേവനം ലഭ്യമാണ്. ഈ വര്‍ഷം ഫെബ്രുവരി 13-ന് പ്രധാനമന്ത്രി നരേന്ദ്രമോദിയാണ് ഈ പദ്ധതി ഉദ്ഘാടനം ചെയ്തത്. ആയുഷ്മാന്‍ ഭാരത് പ്രധാന്‍ മന്ത്രി ജന്‍ ആരോഗ്യ യോജനയ്‌ക്കായി എന്‍എച്ച്എയുടെ കീഴില്‍ എംപാനല്‍ ചെയ്ത ആശുപത്രികളുടെ എണ്ണം മാര്‍ച്ച് മാസത്തെ കണക്കനുസരിച്ച് 36,112 ആണ്. രാജ്യത്തെവിടെയും ഏതെങ്കിലും റോഡ് വിഭാഗത്തില്‍പ്പെട്ട മോട്ടോര്‍ വാഹന അപകടത്തില്‍ പരിക്കേല്‍ക്കുന്ന ആര്‍ക്കും ഈ പദ്ധതി പ്രയോജനപ്പെടുത്താം.
