കോഴിക്കോട്: സന്തോഷ് ട്രോഫി ഫുട്ബോള് ചാമ്പ്യന്ഷിപ്പിന്റെ ദക്ഷിണമേഖലാ യോഗ്യതാ മത്സരങ്ങള്ക്ക് കോഴിക്കോട് വേദിയാവുന്നു. 71-ാമത് സന്തോഷ് ട്രോഫി ഫുട്ബോള് ചാമ്പ്യന്ഷിപ്പില് ദക്ഷിണമേഖലയലില് നിന്നുള്ള ടീമുകളെ നിര്ണയിക്കുന്ന പ്രാഥമിക റൗണ്ട് മത്സരങ്ങള് ജനുവരി അഞ്ചു മുതല് പത്ത് വരെ കോഴിക്കോട് കോര്പറേഷന് സ്റ്റേഡിയത്തില് നടക്കും. ഉച്ചയ്ക്ക് രണ്ടരയ്ക്കും വൈകീട്ട് നാലരയ്ക്കുമാണ് മത്സരങ്ങള് നടക്കുക.
കേരളത്തിന് പുറമെ കര്ണാടക, ആന്ധ്രപ്രദേശ്, പോണ്ടിച്ചേരി എന്നിവയുള്പ്പെട്ട ഗ്രൂപ്പ് എയിലെയും സര്വ്വീസസ്, തമിഴ്നാട്, തെലങ്കാന, ലക്ഷദ്വീപ് എന്നിവയുള്പ്പെട്ട ഗ്രൂപ്പ് ബിയിലെയും ടീമുകള് യോഗ്യതാറൗണ്ടില് മാറ്റുരയ്ക്കും. ഒരു ദിവസം രണ്ട് വീതം മത്സരങ്ങളാണ് പ്രാഥമിക റൗണ്ടില് അരങ്ങേറുക. ഓരോ ഗ്രൂപ്പില് നിന്നും ഒരു ടീം വീതം ഫൈനല് റൗണ്ടിലേക്ക് യോഗ്യത നേടും. നാല് സോണുകളിലുള്ള രണ്ട് ടീമുകള് വീതമാണ് ടൂര്ണമെന്റിന്റെ രണ്ടാംഘട്ടത്തില് മാറ്റുരയ്ക്കുക.
ജനുവരി അഞ്ചിന് ഉച്ചയ്ക്ക് ശേഷം 2.30 ന് നടക്കുന്ന ഉദ്ഘാടന മത്സരത്തില് ആതിഥേയരായ കേരളം പോണ്ടിച്ചേരിയെ നേരിടും. വൈകീട്ട് 4.30 ന് നടക്കുന്ന മത്സരത്തില് കര്ണാടക ആന്ധ്രപ്രദേശുമായി മാറ്റുരയ്ക്കും. ടൂര്ണമെന്റിനുള്ള പ്രവേശനം സൗജന്യമാണ്. കോര്പ്പറഷന് സ്റ്റേഡിയത്തിന് പുറമെ കോഴിക്കോട് മെഡിക്കല് കോളജിലെ രണ്ട് ഗ്രൗണ്ടുകളിലും, ദേവഗിരി സെന്റ്ജോസഫ്സ് കോളജ് ഗ്രൗണ്ടിലുമായാണ് ടീമുകള്ക്ക് പരിശീലനമത്സരത്തിന് വേദികളൊരുക്കിയിരിക്കുന്നത്.
ഈ മാസം 30ന് തിരുവനന്തപുരത്ത് സന്തോഷ്ട്രോഫിയില് മാറ്റുരയ്ക്കുന്ന കേരള ടീമിനെ പ്രഖ്യാപിക്കുമെന്ന് കേരള ഫുട്ബാള് ഫെഡറേഷന് ജനറല് സെക്രട്ടറി പി. അനില്കുമാര് വാര്ത്താസമ്മേളനത്തില് അറിയിച്ചു. കേരള ടീമിനെ എസ്ബിടിയും യോഗ്യതാമത്സരങ്ങളെ എംഎ പ്ലൈ ഗ്രൂപ്പുമാണ് സ്പോണ്സര് ചെയ്തിരിക്കുന്നത്. വാര്ത്താസമ്മേളനത്തില് കെഡിഎഫ്എ വൈസ് പ്രസിഡന്റ് സി. ഉമ്മര്, സെക്രട്ടറി പി. ഹരിദാസ്, ട്രഷറര് പി. പ്രിയേഷ്കുമാര്, പി. രാജീവ്മേനോന്, എം. എ. അബ്ദുള് അസീസ് എന്നിവര് സംബന്ധിച്ചു.
