ശബരിമല : പമ്പ അന്നദാന മണ്ഡപത്തില് വരി നിന്ന കുട്ടികള് അടക്കമുള്ള തീര്ഥാടകര്ക്കുനേരെ പോലീസുകാരന്റെ പരാക്രമം. ചൊവ്വാഴ്ച പകല് ഒന്നരയോടെ അന്നദാന മണ്ഡപത്തില് ഭക്ഷണത്തിനായി ക്യൂ നില്ക്കുകയായിരുന്ന ആന്ധ്ര സ്വദേശികളായ തീര്ഥാടകരെയാണ് പൊലീസുകാരന് അസഭ്യം പറഞ്ഞ് കൈയേറ്റം ചെയ്തത്.
ക്യൂവിനിടയിലേക്ക് കയറിചെന്ന് കുട്ടികളെ പിടിച്ചുമാറ്റുകയും പുറത്തേക്ക് കുഞ്ഞിനെ വലിച്ചെറിയാന് ശ്രമിക്കുകയും ചെയ്തു. ഇത് ചോദ്യം ചെയ്തപ്പോള് തീര്ഥാടകരെ കാലുയര്ത്തി തൊഴിക്കാന് ശ്രമിച്ചു. തീര്ഥാടകരെ വലിച്ചുതള്ളി ചുമരിനോട് ചേര്ത്ത് ഇടിക്കാനും ശ്രമിച്ചു. കണ്ടുനിന്നവര് ഇടപെട്ടതോടെയാണ് ഇയാള് പരാക്രമം അവസാനിപ്പിച്ചത്. ഇയാള് മദ്യപിച്ച് ലഹരിക്ക് അടിപ്പെട്ടവനെ പോലെയായിരുന്നു പരാക്രമം അത്രയും. ഏത് ഡിജിപിയോട് പറഞ്ഞാലും ഒരു ചുക്കുമില്ലെന്നും നടപടിയെടുത്താല് അവരുടെ അന്ത്യമായിരിക്കുമെന്നും ആക്രോശിച്ചു. തീര്ഥാടകര് സംഘടിച്ചപ്പോള് സ്ഥിതി വഷളമാകുമെന്ന് കണ്ട് ഇയാള് പിന്നീട് പതിയെ സ്ഥലം വിടുകയായിരുന്നു. സംഭവത്തെപ്പറ്റി പമ്പ സ്പെഷ്യല് പൊലീസ് ഓഫീസര് അന്വേഷണം ആരംഭിച്ചു.
