കൊച്ചി: ഇന്ത്യന് സൂപ്പര്ലീഗില് കേരള ബ്ലാസ്റ്റേഴ്സിന്റെ കൊച്ചിയില് നടന്ന ഹോം മത്സരങ്ങള്ക്ക് സാക്ഷ്യംവഹിക്കാന് ആവേശപൂര്വ്വം എത്തിയ കേരളത്തിലെ എല്ലാ ഫുട്ബോള് പ്രേമികളോടും കേരള ഫുട്ബോള് അസോസിയേഷന് ഹൃദയം നിറഞ്ഞ നന്ദി രേഖപ്പെടുത്തി.
ഐഎസ്എല് സംഘാടക സമിതിയും ഓള് ഇന്ത്യ ഫുട്ബോള് ഫെഡറേഷനും തമ്മിലുള്ള കരാര് പ്രകാരമാണ് കൊച്ചിയിലെ ഐഎസ്എല് ലീഗ് മത്സരങ്ങള് നടന്നത്. എന്നാല് ഫൈനല് മത്സരത്തിന്റെ നടത്തിപ്പ് ഇതില് നിന്ന് വ്യത്യസ്തമാണ്. ഡിസംബര് 18 ന് കേരള ബ്ലാസ്റ്റേഴ്സും അത്ലറ്റികോ ഡി കൊല്ക്കത്തയും തമ്മില് നടക്കുന്ന മത്സരത്തിന്റെ പൂര്ണ്ണ നടത്തിപ്പ് ചുമതലയും ഉത്തരവാദിത്തവും ഐഎസ്എല് സംഘാടക സമിതിക്കാണ്.
സ്റ്റേഡിയത്തിന്റേയും അനുബന്ധ സേവനങ്ങളുടേയും ഉത്തരവാദിത്വം മാത്രമാണ് കെഎഫ്എയ്ക്കുള്ളത്. ഫൈനല് മത്സരത്തിനുള്ള എല്ലാ പ്രവേശന ടിക്കറ്റുകളും ഐഎസ്എല് മാനേജ്മെന്റാണ് കൈകാര്യം ചെയ്യുന്നത്.
ഫൈനല് മത്സരത്തില് ഫുട്ബോള് പ്രേമികളുടെ ആവേശം കെഎഫ്എ സ്വാഗതം ചെയ്യുന്നു. പക്ഷേ ആവേശം അതിരുവിടരുതെന്ന് കെഎഫ്എ ജനറല് സെക്രട്ടറി പി.അനില്കുമാര് അഭ്യര്ത്ഥിച്ചു.
ഐഎസ്എല് ലീഗ് മത്സരങ്ങളുടെ സുഗമമായ നടത്തിപ്പിന് പൂര്ണ്ണമായി സഹകരിച്ച എല്ലാ സര്ക്കാര് വകുപ്പുകള്ക്കും ജിസിഡിഎ, കൊച്ചി കോര്പ്പറേഷന്, പോലീസ് ഡിപ്പാര്ട്ട്മെന്റ്, പത്ര-ദൃശ്യമാധ്യമങ്ങള് എന്നിവര്ക്കും കെഎഫ്എ നന്ദി പറഞ്ഞു.
