പെരുമ്പാവൂര്: ഭിക്ഷാടന മാഫിയക്കും കുട്ടികളെ തട്ടികൊണ്ടുപോകുന്നതിനെതിരെയും ജാഗ്രതപുലര്ത്താന് സംസ്ഥാനത്ത് ആദ്യമായി രൂപംകൊണ്ട സോഷ്യല് മീഡിയ കൂട്ടായ്മ പെരുമ്പാവൂരില് നടത്തിയ റെയ്ഡില് യാചകരടക്കം 22 പേരെ പിടികൂടി. നഗരസഭയുടേയും തെരുവോര പ്രവര്ത്തക അസോസിയേഷന്റെയും സഹകരണത്തോടെയാണ് പോലീസ് സാന്നിദ്ധ്യത്തില് നഗരത്തില് 5 മണിക്കൂര് നീണ്ട റെയ്ഡ് നടത്തിയത്.
രാത്രി 8ന് തുടങ്ങിയ പരിശോധന വെളുപ്പിന് 1 മണിക്കാണ് അവസാനിച്ചത്. പ്രൈവറ്റ് ബസ് സ്റ്റാന്റ് പരിസരം, താലൂക്കാശുപത്രിക്ക് സമീപത്തെ കെട്ടിടം, മുനിസിപ്പല് കെട്ടിടങ്ങളുടെ സമീപത്തെ കട തിണ്ണകള് എന്നിവിടങ്ങളില് നിന്നുമാണ് സ്ത്രീകളും പുരുഷന്മാരുമടക്കം 22 പേരെ കൂട്ടായ്മ പ്രവര്ത്തകര് പിടികൂടിയത്. പിടിയിലായവര് ലഹരിക്കടിമപ്പെട്ട നിലയിലായിരുന്നു. പിടികൂടിയവരെ തെരുവോര പ്രവര്ത്തക അസോസിയേഷന് സെക്രട്ടറി തെരുവോരം മുരുകന്റെ നേതൃത്വത്തില് സാമൂഹിക നീതിവകുപ്പിന്റെ കീഴിലുള്ള കാക്കനാട്ടെ തെരുവുവെളിച്ചം എന്ന സ്ഥാപന ത്തിലേക്കും കൂവപ്പടി അഭയ ഭവനിലേക്കും മാറ്റി.
ഭിക്ഷാടന മാഫിയ സംഘം കുട്ടികളെ തട്ടികൊണ്ടുപോകുന്നുവെന്ന വാര്ത്ത വ്യാപകമായതോടെയാണ് ഇതിനെതിരെ സോഷ്യല് മീഡിയ കൂട്ടായ്മക്ക് രൂപംകൊടുത്തതെന്ന് മുഖ്യ സംഘാടകനായ യൂസഫ് അന്സാരി പറഞ്ഞു. റെയ്ഡ് ഇനിയും തുടരുമെന്ന് സംഘാടകര് അറിയിച്ചു.
ഭിക്ഷാടന മാഫിയകളെ സംബന്ധിച്ചും ഇവര്ക്കൊപ്പം സംശയ സാഹചര്യത്തില് കാണുന്ന കുട്ടികളെ സമ്പന്ദിച്ചും വിവരം നല്കണമെന്ന് സംഘാടകര് അഭ്യര്ത്ഥിച്ചു.
മുനിസിപ്പല് വൈസ് ചെയര്പേഴ്സണ് നിഷ വിനയന്, പ്രതിപക്ഷ നേതാവ് ബിജുജോണ് ജേക്കബ്ബ്, എല്ദോബാബു വട്ടക്കാവില്, കെ.ഇ. നൗഷാദ്, പി.എം അസീസ്, നെല്സണ് പനക്കല്, ജബ്ബാര് വാത്തേലി എന്നിവര് നേതൃത്വം നല്കി. പ്രൈവറ്റ് സ്റ്റാന്റിലെ കച്ചവടക്കാരും ബസ് ജീവനക്കാരുമടക്കം നിരവധി പേര് പങ്കെടുത്തു.
