ചക്കുളത്തുകാവില്‍ പന്ത്രണ്ടുനോയമ്പ് മഹോത്സവം ഇന്നു തുടങ്ങും

ചക്കുളത്തുകാവ്: ചക്കുളത്തുകാവ് ശ്രീഭഗവതി ക്ഷേത്രത്തില്‍ പന്ത്രണ്ടു നോയമ്പ് മഹോത്സവത്തിന് ഇന്ന് തിരിതെളിയും, 27 ന് താലപ്പൊലി ഘോഷയാത്രയോടെ സമാപിക്കും. ഇന്ന് പുലര്‍ച്ചെ 6 ന് 1,008 നാളികേരം കൊണ്ടുള്ള അഷ്ടദ്രവ്യ മഹാഗണപതി ഹോമം, എട്ടിന് നീരേറ്റുപുറം 10-ാം നമ്പര്‍ എസ്എന്‍ഡിപി യോഗത്തില്‍ നിന്നും ചമയക്കൊടി എഴുന്നെള്ളത്ത്, ഒന്‍പതിന് ക്ഷേത്രമുഖ്യകാര്യദര്‍ശി രാധാകൃഷ്ണന്‍ നമ്പൂതിരി, കാര്യദര്‍ശി മണിക്കുട്ടന്‍ നമ്പൂതിരി, ഉണ്ണികൃഷ്ണന്‍ നമ്പൂതിരി, ഒളശ മംഗലത്തില്ലത്ത് ഗോവിന്ദന്‍ നമ്പൂതിരി, എന്നിവരുടെ നേതൃത്വത്തില്‍ കൊടിയേറ്റും അശോകന്‍ നമ്പൂതിരിയുടേയും രഞ്ജിത്ത് ബി. നമ്പൂതിരിയുടെയും നേതൃത്വത്തില്‍ ചമയകൊടിയേറ്റും നടക്കും. എല്ലാ ദിവസും പ്രസാദമൂട്ടും കളമെഴുത്തും പാട്ടും പ്രഭാക്ഷണങ്ങളും ഉണ്ടായിരിക്കുന്നതാണ്.

ഇന്ന് രാവിലെ ഒന്‍പതിന് നാരീപുജയോട് അനുബന്ധിച്ചുള്ള സംസ്‌കാരിക സമ്മേളനത്തിന്റെ ഉദ്ഘാടനം പത്തനംതിട്ട ജില്ലാ കലക്ടര്‍ ആര്‍. ഗിരിജ നിര്‍വഹിക്കും. നാരീപൂജയുടെ ഉത്ഘാടനം വനിതാകമ്മിഷനംഗം ഡോ. ജെ. പ്രമീളാദേവിയും നിര്‍വ്വഹിക്കും.

16 മുതല്‍ 25 വരെ പള്ളിക്കല്‍ സുനില്‍ യജ്ഞാചാര്യനായി ശ്രീമദ് ദേവീഭാഗവത നവാഹയജ്ഞം നടക്കും. ഇന്ന് 7 .30 ന് താലപ്പൊലി ഘോഷയാത്ര തലവടി തെക്കേക്കര കാണിയ്‌ക്ക മണ്ഡപത്തില്‍ നിന്നും മാണത്താറ ശ്രീ സുബ്രഹ്മണ്യ സ്വാമി ക്ഷേത്രം, തൃക്കയില്‍ ശ്രീ കൃഷ്ണസ്വാമി ക്ഷേത്രം വഴി ചക്കുളത്തുകാവില്‍ എത്തിച്ചേരുന്നു. വൈകിട്ട് എട്ടിന് ചെങ്കോട്ട ഹരിഹര സുബ്രമണ്യത്തിന്റെ സംഗീത സദസ്സ്.

26ന് രാവിലെ ഒന്‍പതിന് കലശാഭിഷേകം, പകല്‍ മൂന്നിന് കാവുംഭാഗം തിരു ഏറങ്കാവ് ദേവീ ക്ഷേത്രത്തില്‍ നിന്നും വാദ്യമേളങ്ങളുടേയും നിരവധി ഫ്‌ളോട്ടുകളുടേയും, മാന്‍, മയിലാട്ടം, കാവടി,ഗരുഢന്‍ പറവ, കഥകളി എന്നിവയുടെ അകമ്പടിയോടെ തങ്ക തിരുവാഭരണ ഘോഷയാത്ര. ആറിന് പുത്തന്‍കാവ് ദേവീ ക്ഷേത്രത്തില്‍ നിന്നും കാവടി വിളക്കും വൈകിട്ട് 6.30 മുതല്‍ കലാദര്‍ശിനി നാട്യ കളരിയുടെ ആഭിമുഖ്യത്തില്‍ ദേവിഉണ്ണിമായയും സംഘവും അവതരിപ്പിക്കുന്ന ഭരതനാട്യ കച്ചേരിയും നടക്കും. രാത്രി 9.30ന് തിരുവാഭരണം ചാര്‍ത്തി സര്‍വ്വ മംഗള ആരതി.

27 ന് രാവിലെ 9 മുതല്‍ ആനപ്രമ്പാല്‍ ശ്രീ ധര്‍മ്മശാസ്താ ക്ഷേത്രത്തില്‍ നിന്നും കാവടി, കരകം മുത്താരമ്മന്‍ കോവിലില്‍ നിന്നും എണ്ണക്കുടം വരവും തുടര്‍ന്ന് ഉച്ചയ്‌ക്ക് ഒന്നിന് ക്ഷേത്ര മുഖ്യ കാര്യദര്‍ശി രാധാകൃഷ്ണന്‍ നമ്പൂതിരി, ക്ഷേത്ര കാര്യദര്‍ശി മണിക്കുട്ടന്‍, ഒളശ്ശ മംഗളില്ലത്ത് ഗോവിന്ദന്‍ നമ്പൂതിരി എന്നിവരുടെ കാര്‍മ്മികത്വത്തില്‍ ചക്കരക്കുളത്തില്‍ ആറാട്ടും, കൊടിയിറക്കും, മഞ്ഞനീരാട്ടും നടക്കുന്നതാണ്. വൈകിട്ട് 6.30 ന് കാരിക്കുഴി എല്‍പി സ്‌കൂളിനു സമീപമുള്ള താല്ക്കാലിക മണ്ഡപത്തില്‍ നിന്നും കരതാലം വരവും ചമയക്കൊടിയിറക്കും.