കൊച്ചി: ദേശീയ പ്രതിബിംബങ്ങളെയും ദേശീയഗാനത്തെയും അംഗീകരിക്കാതിരിക്കുകയും അപമാനിക്കുകയും ചെയ്യുന്നത് രാജ്യദ്രോഹംതന്നെയാണെന്ന് ബിജെപി സംസ്ഥാന ജനറല് സെക്രട്ടറി എ.എന്. രാധാകൃഷ്ണന് പ്രസ്താവിച്ചു. ദേശീയതയെക്കുറിച്ച് പാശ്ചാത്യ നിര്വചനം മാത്രം പരിശീലിച്ച അരാഷ്ട്രീയ-വിഘടനവാദികളുടെ ഭാഷയില് സംസ്കാരചിത്തരായ ചലച്ചിത്രോത്സവ സംഘാടകര് സംസാരിക്കുന്നതും അംഗീകരിക്കാനാവില്ല. മഹാന്മാരായ സ്വാതന്ത്ര്യസമരസേനാനികള് ജീവന് വെടിഞ്ഞുംജീവിതം ഹോമിച്ചും നേടിത്തന്ന രാഷ്ട്രീയസ്വാതന്ത്ര്യം വ്യക്തി സ്വാതന്ത്ര്യത്തിന്റെ തൊടുന്യായം പറഞ്ഞ് തകര്ക്കാന് ശ്രമിക്കുന്നത് ശക്തമായിത്തന്നെ നേരിടണമെന്നാണ് ബിജെപിയുടെ ആവശ്യം.
കേരളത്തിലെ ചില അരാഷ്ട്രീയവാദികളായ, സര്ഗ്ഗവാസന നഷ്ടപ്പെട്ട് അവസരങ്ങള് ഇല്ലാതായ സംവിധായകര് രാഷ്ട്രീയ കൂട്ടിക്കൊടുപ്പിലൂടെയും ഒറ്റുകൊടുക്കലിലൂടെയും നേടിയെടുത്ത പദവികള് ദേശീയഗാനത്തെ അപമാനിക്കുവാന് ഉപയോഗപ്പെടുത്തുന്നത് സംസ്ഥാനസര്ക്കാര് നോക്കിനില്ക്കരുതെന്ന് അദ്ദേഹം പറഞ്ഞു.
ബഹുഭൂരിപക്ഷം വരുന്ന ദേശഭക്തരായ സാധാരണക്കാരുടെ നികുതിപ്പണം ഉപയോഗിച്ച് നടത്തുന്ന ചലച്ചിത്രോത്സവങ്ങള്ക്കും നാടിന്റെ നിയമങ്ങള് പാലിക്കുവാനും കോടതികളുടെ ഉത്തരവുകള് നടപ്പിലാക്കുവാനും ഉള്ള നിയമപരമായ ബാധ്യതയുണ്ട്. ഇത്തരം ദേശദ്രോഹ നടപടികള്ക്കെതിരെ മാതൃകാപരമായി നടപടിയെടുത്ത് ഈ പ്രവണതയെ മുളയിലെ നുള്ളിക്കളയണമെന്ന് എ.എന്. രാധാകൃഷ്ണന് അഭിപ്രായപ്പെട്ടു.
