തലശ്ശേരി: വാടക നല്കാത്തതിന്റെ പേരില് ക്വാര്ട്ടേര്സ് ഉടമ അമ്മയെയും 12 വയസ്സുള്ള വിദ്യാര്ത്ഥിയായ മകനെയും മുറിയില് പൂട്ടിയിട്ടു. വെളിയില് കടക്കാനാവാതെ മണിക്കൂറുകളോളം ബന്ദിയാക്കപ്പെട്ടതിന്റെ മാനസിക ആഘാതത്തില് ബോധമറ്റുവീണ വീട്ടമ്മയെ വിവരമറിഞ്ഞെത്തിയ പോലീസ് സംഘം പൂട്ടുതകര്ത്ത് മോചിപ്പിച്ച് ആശുപത്രിയിലേക്ക് മാറ്റി. എരഞ്ഞോളി പാലത്തിനടുത്തുള്ള പത്മ ക്വാര്ട്ടേര്സിലാണ് വാടകക്കുടിശ്ശികയുടെ പേരില് നിര്ധന കുടുംബത്തിന് ക്വാര്ട്ടേര്സ് ഉടമയുടെ പീഡനമേല്ക്കേണ്ടി വന്നത്. വിധവയും സര്ക്കസ് കലാകാരിയുമായ ധര്മ്മടം സ്വദേശിനി ശാലിനി രണ്ട് ആണ്മക്കളോടൊപ്പമായിരുന്നു ക്വാര്ട്ടേര്സില് താമസിച്ചിരുന്നത്. സാമ്പത്തികപ്രയാസം കാരണം കഴിഞ്ഞ ഏതാനും മാസങ്ങളായി മുറിവാടക നല്കിയിരുന്നില്ല. ഇതിനിടെ മൂത്തമകന് സന്ദീപിന് തമിഴ്നാട്ടില് താല്ക്കാലിക ജോലികിട്ടി. ഇളയ മകനെയും കൂട്ടി ശാലിനി കഴിഞ്ഞ ദിവസം മൂത്തമകന്റെ ജോലി സ്ഥലത്തേക്ക് പോയിരുന്നു. ഇന്നലെ രാവിലെയാണ് തിരിച്ചെത്തിയത്. യാത്രാക്ഷീണം കാരണം മുറിയില് ഉറങ്ങുന്ന സമയത്താണ് ക്രുദ്ധനായെത്തിയ ക്വാര്ട്ടേര്സ് ഉടമ അമ്മയേയും മകനേയും പുറത്തുനിന്നും വാതിലടച്ച് പുതിയ പൂട്ടിട്ട് പൂട്ടിയത്. ഇതിനുശേഷം ഇയാള് സ്ഥലം വിട്ടുവത്രെ. മകന് സ്കൂളില് പരീക്ഷക്ക് ഹാജരാവാനായി പുറപ്പെട്ടപ്പോഴാണ് വാതില് പുറത്തുനിന്നും പൂട്ടിയതായി തിരിച്ചറിഞ്ഞത്. ഏറെനേരം ശ്രമിച്ചിട്ടും ആരും സഹായത്തിനെത്തിയില്ല. മുറിയില് അകപ്പെട്ട ശാലിനി പരിചയക്കാരെ ഫോണില് വിളിച്ചു കാര്യം പറഞ്ഞു. വിവരമറിഞ്ഞെത്തിയ സാമൂഹ്യപ്രവര്ത്തകന് പ്രസൂണ് ശില്പകലയും മാധ്യമ പ്രവര്ത്തകരുമാണ് പോലീസിനെ വിളിച്ചുവരുത്തി കുടുംബത്തെ മോചിപ്പിക്കാന് വഴിയൊരുക്കിയത്.
വാടക നല്കാത്തതിന്റെ പേരില് ക്വാര്ട്ടേര്സ് ഉടമ അമ്മയെയും മകനെയും മുറിയില് പൂട്ടിയിട്ടു
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.