ചേര്ത്തല: നഗരസഭയുടെ ലൈസന്സില്ല. വിദേശ മദ്യ വില്പ്പനശാല അടച്ചുപൂട്ടും. വടക്കേ അങ്ങാടി കവലയ്ക്ക് സമീപം വടക്ക് ഭാഗത്ത് ഇടറോഡിന് അഭിമുഖമായുള്ള വില്പ്പന ശാലയുടെ പ്രവര്ത്തനം നിര്ത്താനാണ് നഗരസഭ അധികൃതര് നിര്ദ്ദേശം നല്കിയത്.
കാലങ്ങളായി സ്ഥാപനം ലൈസന്സില്ലാതെയാണ് പ്രവര്ത്തിച്ചിരുന്നത്. ലൈസന്സിനായി ബിവറേജസ് കോര്പ്പറേഷന് അധികൃതര് അപേക്ഷ നല്കിയെങ്കിലും നിയമപ്രകാരം ആവശ്യമായ രേഖകള് ഇല്ലാത്തതിനാല് തള്ളുകയായിരുന്നു.
ഇതിനെതിരെ കോടതിയെ സമീപിച്ച ബിവറേജസ് അധികൃതര് അപേക്ഷ നഗരസഭയുടെ പരിഗണനയിലാണെന്ന വാദമുന്നയിച്ചാണ് ഇതുവരെ പ്രവര്ത്തിച്ചിരുന്നത്. നഗരസഭ അധികാരികള് നിയമപരമായല്ല സ്ഥാപനം പ്രവര്ത്തിക്കുന്നതെന്ന് കോടതിയെ ബോധ്യപ്പെടുത്തുകയായിരുന്നു. തുടര്ന്നാണ് കൗണ്സില് യോഗം ചേര്ന്ന് സ്ഥാപനത്തിന്റെ പ്രവര്ത്തനം നിര്ത്തിക്കാന് തീരുമാനിച്ചത്.
ഏതാനും ദിവസത്തേക്ക് തുടരാനുവദിക്കണമെന്ന് ആവശ്യപ്പെട്ട് വില്പ്പനശാലയുടെ ചുമതലക്കാര് നഗരസഭ അധികൃതരെ സമീപിച്ചെങ്കിലും ഇത് അനുവദിക്കില്ല എന്ന നിലപാടിലായിരുന്നു ബന്ധപ്പെട്ടവര്. അനധികൃതമായി സ്ഥാപനം തുറന്നാല് പോലീസിന്റെയും എക്സൈസിന്റെയും സഹായത്തോടെ അടച്ചുപൂട്ടിക്കുമെന്ന് ചെയര്മാന് ഐസക് മാടവന പറഞ്ഞു.
രണ്ട് മദ്യവില്പ്പന ശാലകള് മേഖലയില് പ്രവര്ത്തിക്കുന്നത് മൂലം വാഹനത്തിരക്കേറിയ റോഡില് ഗതാഗതക്കുരുക്കും അപകടങ്ങളും പതിവാണ്. മദ്യം വാങ്ങാനെത്തുന്നവരുടെ വാഹനങ്ങളും മറ്റും റോഡരുകില് പാര്ക്ക് ചെയ്യുന്നതിനാല് മേഖലയിലെ വ്യാപാര സ്ഥാപനങ്ങളില് കച്ചവടവും ഗണ്യമായി കുറഞ്ഞു. അടച്ചുപൂട്ടാന് നിര്ദ്ദേശിച്ച വില്പ്പനശാലയിലെ ക്യൂ സമീപത്തെ റോഡിലേക്ക് നീളുന്നത് മൂലം ഇതുവഴി കാല്നട യാത്രക്കാര്ക്ക് പോലും സഞ്ചരിക്കാനാകാത്ത സ്ഥിതിയാണ്.
പ്രദേശവാസികള് മറ്റ് വഴികളിലൂടെയാണ് കാലങ്ങളായി സഞ്ചരിക്കുന്നത്. തങ്ങളുടെ ദുരിതം ചൂണ്ടിക്കാട്ടി നാട്ടുകാര് നഗരസഭ ചെയര്മാനടക്കം പരാതി നല്കിയിരുന്നു.
