ബാഗ്ദാദ്: ഇറാഖി സൈന്യത്തിനെതിരെയുള്ള ഇസ്ലാമിക് സ്റ്റേറ്റിന്റെ ചെറുത്തു നില്പ്പ് ശക്തമാക്കിയതായി റിപ്പോര്ട്ട്. പ്രദേശത്തെ ഐഎസിന്റെ ആക്രമണങ്ങളും വര്ധിച്ചു വരികയാണ്. നിലവില് ഐഎസില് നിന്നും മൊസൂള് തിരിച്ചുപിടിക്കാനുള്ള ശ്രമത്തിലാണ് ഇറാഖി സൈന്യം.
അതിനിടെ 2014 മുതല് ഈ കാലയളവ് വരെ ഐഎസുമായുള്ള യുദ്ധത്തില് 173 നാട്ടുകാര് കൊല്ലപ്പെട്ടതായി യുഎസ് ഔദ്യോഗിക വൃത്തങ്ങള് അറിയിച്ചു. എന്നാല് 1500 പേരെങ്കിലും ചുരുങ്ങിയത് മരിച്ചിട്ടുണ്ടെന്ന് ലണ്ടന് കേന്ദ്രീകരിച്ചു പ്രവര്ത്തിക്കുന്ന സ്ഥാപനത്തിന്റെ റിപ്പോര്ട്ടില് പറയുന്നുണ്ട്. ഇത് സ്ഥിരീകരിച്ചിട്ടില്ല.
സൈനിക നീക്കത്തില് നാട്ടുകാര് കൊല്ലപ്പെടുകയും, പരിക്കേല്ക്കുന്നതും ശ്രദ്ധയില്പ്പെട്ടിട്ടുണ്ടെന്നും, ഇത് കുറയ്ക്കുന്നതിനുവേണ്ട നടപടികള് സ്വീകരിച്ചുകൊണ്ടിരിക്കുന്നതായും ഇറാഖ് പ്രധാനമന്ത്രി ഹെയ്ദര് അല് അബാദി പ്രസ്താവനയില് അറിയിച്ചു.
അതിനിടെ ഞായറാഴ്ച ഫലുജയിലെ സെക്യൂരിട്ടി ചെക്ക്പോസ്റ്റിലുണ്ടായ കാര്ബോംബ് സ്ഫോടനത്തില് രണ്ട് പേര് കൊല്ലപ്പെട്ടതായി ഇറാഖി അഭ്യന്തര വകുപ്പ് വക്താവ് ബ്രിഗേഡിയര് ജനറല് സാദ് മാന് അറിയിച്ചു.
കഴിഞ്ഞമാസം ഫല്ലുജയ്ക്കു സമീപത്ത് മൂന്നിടങ്ങളിലായി ഐഎസ് നടത്തിയ ഭീകരാക്രമണത്തില് 16 പേരാണ് കൊല്ലപ്പെട്ടത്. ഐഎസിന്റെ അധീനതയിലായിരുന്ന ഫല്ലുജ കഴിഞ്ഞ ജൂണിലാണ് ഇറാഖിസൈന്യം തിരിച്ചുപിടിച്ചത്.
