ബത്തേരി : ശൈത്യകാലത്തിന്റെ ആഗമനത്തോടെ വയനാട്ടിലെ കാര്ഷിക വിളവെടുപ്പില് പങ്കാളികളാകാന് അയല് സംസ്ഥാന തൊഴിലാളികൂട്ടങ്ങള് എത്തിയിരുന്നത് കര്ഷക കുടുംബങ്ങള്ക്ക് ഗൃഹാതുര സ്മരണകള്മാത്രമാകുന്നു. തമിഴ്്നാട്-കര്ണ്ണാടക തൊഴിലാളികളുടെ വരവോടെ വയനാടന് ഗ്രാമങ്ങളിലെ തീയേറ്ററുകളില് പോലും അതിന്റെ പ്രതിഫലനം ദൃശ്യമായിരുന്നു. വയനാടിന്റെ കാര്ഷിക സമ്പദ്ഘടനയില് വിലപ്പെട്ട സംഭാവനകള് നല്കിയ തെക്കന് സംസ്ഥാന തൊഴിലാളികളുടെ സ്ഥാനത്ത് ഇന്ന് ബംഗാള്-ഗുജറാത്ത്, ബീഹാര്് തൊഴിലാളികള് ഉണ്ടെങ്കിലും അവരിലേറെയും ഹോട്ടല്-നിര്മ്മാണ മേഖലയിലാണ് പണിയെടുക്കുന്നത്.
കാര്ഷികരംഗംത്ത് സമയം ചെലവഴിക്കാന് തയ്യാറാകാതെ വയനാടന് കര്ഷകരുടേയും കര്ഷകതൊഴിലാളികളുടേയും പിന്മുറക്കാര് പണി തേടി വ്യവസായിക നഗരങ്ങളിലും വിദേശതൊഴില് വിപണികളിലും എത്തിയതോടെ കാര്ഷിക വിളവെടുപ്പ് പഴമക്കാരുടെ ഓര്മ്മ പുതുക്കല് മാത്രമാവുകയാണ്. ഇതോടൊപ്പം കാലാവസ്ഥയിലുണ്ടായ പ്രതികൂലമാറ്റവും മഴക്കുറവും ജലക്ഷാമവും കൃഷിയിടത്തിലെ വന്യജീവിശല്ല്യവും കൃഷി മേഖലയിലെ തൊഴിലാളി ക്ഷാമവുമെല്ലാം കാര്ഷിക മേഖലയിലെ ദരിദ്രവത്ക്കരണത്തിന് ആക്കം കൂട്ടുകയാണ്.
പ്രധാന വിളകളായ കാപ്പി, കുരുമുളക്, ഇഞ്ചി തുടങ്ങിയവയിലെല്ലാം ഇക്കുറി ഉത്പാദനത്തില് വന്കുറവാണ് ഉണ്ടായിരിക്കുന്നത്. മുന് വര്ഷത്തെ അപേക്ഷിച്ച് ജില്ലയില് അനുഭവപ്പെട്ട അറുപത് ശതമാനം മഴക്കുറവ് തന്നെയാണ് ഉത്പാദനക്കുറവിനും കാരണമായത്. ദൈനംദിനം രൂക്ഷമാകുന്ന പാരിസ്ഥിതിക പ്രതിസന്ധിക്കിടയിലും ഓരോ കാരണം പറഞ്ഞ് കാര്ഷികോത്പ്പന്ന വിപണിയില് വിലയിടിവ് തുടരുക യാണ്.
