കല്പ്പറ്റ : കേരളത്തില് നിരോധിച്ച പല കീടനാശിനികളും ജില്ലയില് സുലഭം. ഫ്യൂറഡാന്, ഫോറെയ്റ്റ്, റ്റിമിറ്റ് തുടങ്ങിയ ഇരുപതോളം കീടനാശിനികളാണ് നിരോധന പട്ടികയിലുള്ളത്. എന്നാല് രണ്ട് സംസ്ഥാനങ്ങളുമായി അതിര്ത്തി പങ്കിടുന്ന വയനാട് ജില്ലയില് നിരോധിച്ച കീടനാശിനികള് മിക്ക വളം-കിടനാശിനി കടകളിലും രഹസ്യമായി ലഭിക്കുന്നുണ്ട് എന്ന് കര്ഷകര് സാക്ഷ്യപ്പെടുത്തുന്നു. രാസവള കീടനാശിനികളുടെ അനിയന്ത്രിതമായ ഉപയോഗം കൊണ്ട് വയനാടിന്റെ ജൈവ സന്തുലിതാവസ്ഥ എന്നേ നഷ്ടപ്പെട്ടതാണ്. വയനാട്ടില് സുലഭമായിരുന്ന ഞണ്ടും മണ്ണിരയുമടക്കമുള്ള സൂക്ഷ്മ ജീവികള് വാഴ, ഇഞ്ചി, തേയില, മരച്ചീനി തുടങ്ങിയ കൃഷി ചെയ്യുന്ന സ്ഥലങ്ങളില് നിന്ന് അപ്രത്യക്ഷ മാ യിക്കൊണ്ടിരിക്കുന്നു. കൂടാതെ പ്രദേശങ്ങളിലെ ജലസ്രോതസുകളില് മാരക കീടനാശിനികളുടെ സാന്നിദ്ധ്യം മുന്കാലങ്ങളില്നിന്ന് എത്രയോ മടങ്ങ് കൂടുതലാണെന്ന് പരിശോധനകളില് തെളിഞ്ഞിട്ടുണ്ട്. വിഷപച്ചക്കറികളുടെ കാര്യത്തില് അന്യ സംസ്ഥാനക്കാരെ പഴിക്കുമ്പോള് നാം നമ്മള് ഉല്പ്പാദിപ്പിക്കുന്ന പച്ചക്കറികള് ഏതു രീതിയിലാണെന്നു മറന്നു പോവുകയാണ്.
വയനാട്ടില് ക്യാന്സര് രോഗികളുടെ എണ്ണം ഓരോ വര്ഷിക കണക്കിലും അധികരിക്കുകയാണ്. പ്രമുഖ ആശുപത്രികള് ക്യാന്സര് ചികിത്സക്കായി നൂതന ചികിത്സാരീതികള് കൊണ്ടുവരുന്നുണ്ട്. വളരേയേറെ പണ ചിലവുള്ള ഇത്തരം ചികിത്സകള് പാവപ്പെട്ടവര്ക്ക് താങ്ങാവുന്നതിലും അപ്പുറവുമാണ്. രോഗം വന്നു ചികിത്സിക്കുന്നതിനേക്കാള് നല്ലത് അത് വരാതെ സൂക്ഷിക്കുകയാണ് എന്ന അവബോധം ജനങ്ങളില് സൃഷ്ടിക്കുന്നതിനുപകരം രോഗകാരണമാകുന്ന കീടനാശിനികള് സുലഭമാകുന്നതിനെതിരെ നടപടി സ്വീകരിക്കാതിരിക്കുകയാണ് സര്ക്കാര് ചെയ്യുന്നത്. എരുമാട്, താളൂര്, പാട്ടവയല്, അയ്യന്കൊല്ലി തുടങ്ങിയ സ്ഥലങ്ങള് വഴിയും നിരോധിച്ച കീടനാശിനികള് വയനാട്ടിലെത്തുന്നുണ്ട്. ചെക്കുപോസ്റ്റുകളിലെ പരിശോധന കര്ശനമാക്കിയാല് ഇതിനു കുറേ ആശ്വാസം ഉണ്ടായേക്കാം.
