കല്പ്പറ്റ: ജില്ലാ കലക്ടറുടെ നിര്ദേശം മറികടന്ന് മട്ടിപ്പാറ ഖനനത്തിന് അനുമതി നല്കിയ സംഭവത്തില് കുറ്റക്കാരനെന്ന് കണ്ടെത്തിയതിനെതുടര്ന്ന് താക്കീത് നല്കിയ മുന് ഡെപ്യൂട്ടി കലക്ടറുടെ പുനപരിശോധനാ ഹര്ജി റവന്യൂ വകുപ്പ് തള്ളി. താക്കീത് നടപടി പുനപരിശോധിക്കണമെന്ന് ആവശ്യപ്പെട്ട് വയനാട് ഡെപ്യൂട്ടി കലക്ടറും ( ജനറല്) മുന് എ.ഡി.എമ്മുമായ പി. അറുമുഖന് നല്കിയ ഹര്ജിയാണ് തള്ളിയത്. മട്ടിപ്പാറ ഖനനത്തിന് അനുമതി നല്കിയെന്ന പരാതിയില് ഔദ്യോഗിക അന്വേഷണം നടത്തിയ വേളയില് സമര്പ്പിച്ചതല്ലാതെ ഇതുസംബന്ധിച്ച കൂടുതല് വിവരങ്ങള് അറുമുഖന് പുനപരിശോധനാ ഹര്ജിയില് ഹാജരാക്കാന് കഴിഞ്ഞില്ലെന്നാണ് റവന്യൂ വകുപ്പ് ജോയിന്റ് സെക്രട്ടറി രമണീ മാത്യുവിന്റെ ഉത്തരവില് പറയുന്നത്.
അറുമുഖന് വയനാട്ടില് ഡെപ്യൂട്ടി കലക്ടറായി സേവനമനുഷ്ഠിച്ച കാലത്ത് കൃഷ്ണഗിരി വില്ലേജിലെ സര്വെ നമ്പര് 198/വണ് ബിയില് പെട്ട സ്ഥലത്തു നിന്ന് മട്ടിപ്പാറ ഖനനം ചെയ്യുന്നതിന് കെ.കെ. ഷാജു എന്നയാള്ക്ക് എന്.ഒ.സി. നല്കിയിരുന്നു. ജില്ലാ കലക്ടറുടെ നിര്ദേശം മറികടന്നായിരുന്നു ഇത്. ഇതേ തുടര്ന്ന് ജില്ലാ കലക്ടര് അറുമുഖനെതിരേ അച്ചടക്ക നടപടി ആരംഭിച്ചു. അറുമുഖന് കുറ്റം ചെയ്തുവെന്ന് തെളിഞ്ഞതിനാല് ഇനി ഇത്തരം സംഭവങ്ങള് ആവര്ത്തിക്കരുതെന്ന് അദേഹത്തെ താക്കീത് നല്കി റവന്യൂ വകുപ്പ് അച്ചടക്ക നടപടി തീര്പ്പാക്കുകയും ചെയ്തു. ഈ ഉത്തരവ് പുനപരിശോധിക്കണമെന്ന് ആവശ്യപ്പെട്ടാണ് അറുമുഖന് ഹര്ജി നല്കിയത്. ജില്ലാ കലക്ടര് പ്രസ്തുത വിഷയത്തില് രണ്ട് സംശയങ്ങള് മാത്രമാണ് പ്രകടിപ്പിച്ചതെന്നും എന്.ഒ.സി. അനവ
വദിക്കരുതെന്ന് കലക്ടര് ഫയലില് ഉത്തരവിട്ടിട്ടില്ലായിരുന്നുവെന്നും ജില്ലാ കലക്ടറുടെ സംശയങ്ങള്ക്കുള്ള മറുപടി ഫയലില് നിന്ന് ദുരീകരിച്ചിരുന്നതായയുമാണ് അറുമുഖന് പുനപരിശോധനാ ഹര്ജിയില് പറഞ്ഞത്. കൂടാതെ വീട് നിര്മിക്കുന്നതിനായി 21.2 സെന്റ് സ്ഥലത്തു നിന്നും സ്ഫോടനം നടത്താതെ മട്ടിപ്പാറ ഖനനം ചെയ്യാനാണ് താന് അനുമതി നല്കിയതെന്നും അറുമുഖന് ഹര്ജിയില് ചൂണ്ടിക്കാട്ടിയിരുന്നു.
അറുമുഖന്റെ പുനപരിശോധനാ ഹര്ജി സര്ക്കാര് വിശദമായി പരിശോധിച്ചു. അച്ചടക്ക നടപടിയുടെ ഭാഗമായി മുമ്പ് നടത്തിയ അന്വേഷണത്തില് റവന്യൂ വിജിലന്സ് ഡെപ്യൂട്ടി കലക്ടര് മുമ്പാകെ നല്കിയ പ്രസ്താവനയിലും കുറ്റപത്രത്തിന് നല്കിയ മറുപടിയിലും വിശദീകരിച്ച കാര്യങ്ങള് തന്നെയാണ് അറുമുഖന് പുനപരിശോധാ ഹര്ജിയിലും ആവര്ത്തിച്ചിരിക്കുന്നതെന്നും അതല്ലാതെ മേല് ഉത്തരവ് പുനപരിശോധിക്കുന്നതിനാവശ്യമായ വസ്തുതകളോ വിവരങളോ ഹര്ജിയില്ലെന്നും ജോയിന്റ് സെക്രട്ടറിയുടെ ഉത്തരവില് പറയുന്നു.
