ജീവനക്കാരുടെ രാഷ്‌ട്രീയ ചേരിതിരിവ്: ഇടപാടുകാര്‍ ബാങ്കുകളുമായി അകലുന്നു

കണ്ണൂര്‍: ചില ബാങ്ക് ജീവനക്കാരുടെ രാഷ്‌ട്രീയ ചേരിതിരിവ് കാരണം ഇടപാടുകാര്‍ ബാങ്കുകളില്‍ നിന്നും അകലുന്നു. നോട്ടുകള്‍ അസാധുവാക്കല്‍ നടപടികള്‍ക്ക് ശേഷം ജില്ലയിലെ പല ബാങ്കുകളിലും സുഗമമായ ബാങ്കിടപാട് നടക്കുന്നില്ല. ഇടപാടിനായി ബാങ്കുകളിലെത്തുന്നവരെ രാവിലെ മുതല്‍ ക്യൂ നിര്‍ത്തി രസിക്കുകയാണ് ചില ഉദ്യോഗസ്ഥര്‍. മണിക്കൂറുകള്‍ ക്യൂ നിന്നാല്‍ പോലും 100-120 ടോക്കണ്‍ മാത്രമാണ് പല ബാങ്കുകളില്‍ നിന്നും ഇടപാടുകാര്‍ക്കായി നല്‍കുന്നത്. ഇങ്ങനെ ക്യൂ നിന്ന് ടോക്കണ്‍ വാങ്ങി കൗണ്ടറിലെത്തിയാല്‍ സര്‍ക്കാര്‍ പ്രഖ്യാപിച്ച പണം പോലും പല ഇടപാടുകാര്‍ക്കും പിന്‍വലിക്കാന്‍ കഴിയുന്നില്ല. എന്നാല്‍ ചില ബാങ്ക് ജീവനക്കാര്‍ ഇതില്‍ നിന്നും വ്യത്യസ്തമായി പരമാവധി ഇടപാടുകാരുമായി സഹകരിക്കുന്നുമുണ്ട്. ആര്‍ബിഐയില്‍ നിന്നും ദിനംപ്രതി കോടിക്കണക്കിന് രൂപയുടെ നോട്ടുകള്‍ സംസ്ഥാനത്തെ ബാങ്കുകളിലേക്ക് എത്തുന്നുണ്ടെങ്കിലും പല ബാങ്കുകളിലും പണവിതരണം കാര്യക്ഷമമല്ല. മലയോരത്തെ എടിഎമ്മുകളില്‍ പണം നിറക്കാന്‍ പോലും ചില ബാങ്ക് ഉദ്യോഗസ്ഥര്‍ തയ്യാറാകുന്നില്ല. അപൂര്‍വ്വം ചില എടിഎമ്മുകളില്‍ പണം നിറക്കല്‍ പ്രവൃത്തി നടക്കുന്നുണ്ടെങ്കിലും മണിക്കൂറിനുള്ളില്‍ ഇവ കാലിയാവുകയാണ്. എന്നാല്‍ നഗരങ്ങളിലെ എടിഎമ്മുകളില്‍ ഒട്ടുമിക്കതിലും പണം ലഭ്യവുമാണ്. കഴിഞ്ഞ 8 ന് ശേഷം ഒരുദിവസം പോലും പ്രവര്‍ത്തിക്കാത്ത ഒട്ടനവധി എടിഎമ്മുകള്‍ ജില്ലയിലുണ്ട്. പുതിയ 500, 2000 നോട്ടുകള്‍ നിക്ഷേപിക്കാനുള്ള ശേഷി എടിഎമ്മുകളില്‍ സജ്ജീകരിച്ചുകഴിഞ്ഞുവെങ്കിലും ചില ഉദ്യോഗസ്ഥര്‍ മനപൂര്‍വ്വം ഇത് ചെയ്യാതിരിക്കുകയാണ്. ഇടപാടുകാര്‍ ബാങ്കിലെത്തി ഇതിനെതിരെ പ്രതികരിച്ചാല്‍ കേന്ദ്രസര്‍ക്കാറിനെയും പ്രധാനമന്ത്രിയെയും പഴിചാരി രക്ഷപ്പെടാനാണ് ഇവര്‍ ശ്രമിക്കുന്നത്. കേരളത്തിലെ ഇടതുപക്ഷ-വലതുപക്ഷ യൂണിയനുകളില്‍പ്പെട്ട ഉദ്യോഗസ്ഥര്‍ ഇത്തരം ശ്രമങ്ങള്‍ക്കായി മത്സരിക്കുകയാണ്. സംസ്ഥാനത്തെ സഹകരണ ബാങ്കുകള്‍ രണ്ടുദിവസം കൊണ്ട് പൂര്‍വ്വസ്ഥിതിയിലാകുമെന്നാണ് കരുതുന്നത്. സംസ്ഥാനത്ത് കഴിഞ്ഞദിവസം 150 കോടി രൂപയുടെ 500 രൂപ നോട്ടുകള്‍ എത്തിയിരുന്നുവെങ്കിലും ബാങ്കുകളില്‍ നിന്നും നിമിഷങ്ങള്‍ക്കുള്ളില്‍ ഇവ അപ്രത്യക്ഷമാവുകയായിരുന്നു. ബാങ്ക് ജീവനക്കാര്‍ സ്വന്തക്കാര്‍ക്കും വേണ്ടപ്പെട്ടവര്‍ക്കും ഇവ നല്‍കിയെന്നാണ് സൂചന. ബാങ്ക് ഉദ്യോഗസ്ഥര്‍ കൃത്രിമമായി സൃഷ്ടിക്കുന്ന പ്രതിസന്ധി ബാങ്കുകളുടെ പ്രവര്‍ത്തനത്തെത്തന്നെ ബാധിച്ച മട്ടിലാണുള്ളത്. ജനങ്ങളെ ബുദ്ധിമുട്ടിക്കുന്ന ബാങ്ക് ഉദ്യോഗസ്ഥര്‍ക്കെതിരെ ശക്തമായ നടപടി സ്വീകരിക്കണമെന്നാണ് ഇടപാടുകാരുടെ ആവശ്യം.