ശബരിമല: സന്നിധാനത്തെ പുതിയ മാലിന്യ സംസ്കരണശാലയില് സോഡിയം ഹൈപ്പോക്ലോറേറ്റ് ഉപയോഗിച്ച് തുടങ്ങിയത് പമ്പയെ മലിനപ്പെടുത്തുമെന്ന് ആശങ്ക.
തികച്ചും ജൈവരീതിയിലുളള ശുദ്ധീകരണശാലയാണ് സന്നിധാനനത്തുള്ളത്. ഇതില് ശുദ്ധീകരിച്ചു പുറത്തേക്കു വിടുന്ന വെള്ളത്തില് കോളിഫോം ബാക്ടീരിയയുടെ സാന്നിധ്യം കണ്ടെത്തിയതിനെ തുടര്ന്നാണ് മലിനീകരണ നിയന്ത്രണ ബോര്ഡിന്റെ നിര്ദ്ദേശത്തെ തുടര്ന്ന് രാസപദാര്ത്ഥമായ ഹൈപ്പോക്ലോറേറ്റ് ഉപയോഗിച്ച് തുടങ്ങിയത്. ഓസോണ് ശുദ്ധീകരണത്തിലെ അപാകതയാണ് ഇതിനു കാരണമെന്നു കണ്ടെത്തി. ഇതിനു പരിഹാരമായാണ് ഹൈപ്പോക്ലോറേറ്റ് ഉപയോഗിച്ചുള്ള ശുദ്ധീകരണം നടത്തുന്നത്. എന്നാല്, മാലിന്യ സംസ്കരണശാലയുടെ പ്രവര്ത്തനം നിര്ത്തിവയ്ക്കാന് നിര്ദേശം നല്കിയിട്ടില്ലെന്ന് മലിനീകരണ നിയന്ത്രണ ബോര്ഡിലെ അസിസ്റ്റന്റ് പരിസ്ഥിതി എന്ജിനീയര് ആര്തര് സേവ്യര് പറഞ്ഞു. ബെയ്ലി ബ്രിഡ്ജിനു സമീപം പ്രവര്ത്തിക്കുന്ന മാലിന്യ സംസ്കരണശാലയില് അത്യന്താധുനിക സംവിധാനങ്ങള് സജ്ജീകരിച്ചിട്ടുണ്ട്.
സന്നിധാനത്തെ വിവിധ സ്ഥലങ്ങളില് നിന്നുള്ള ദ്രവമാലിന്യം ഇവിടെ എത്തിച്ചു മൂന്നു ഘട്ടങ്ങളിലായി സൂക്ഷ്മമായ പരിശോധന പ്രക്രിയകളിലൂടെ പമ്പയാറ്റിലേക്ക് ഒഴുക്കിവിടുകയാണ്. ഒന്നാം ഘട്ടത്തില് ഓയില്, ഗ്രീസ്, പ്ലാസ്റ്റിക് മാലിന്യങ്ങള് എന്നിവ അരിച്ചു മാറ്റപ്പെടുന്നു. രണ്ടാം ഘട്ടത്തില് അനെയ്റോബിക്, എയ്റോബിക് പ്രക്രിയകളിലൂടെ ജൈവ മാലിന്യങ്ങളെ നീക്കം ചെയ്യുന്നു.
അവസാന ഘട്ടത്തില് പൂര്ണമായും മാലിന്യവിമുക്തമാക്കിയ ജലം പമ്പയാറ്റിലേക്ക് ഒഴുക്കിവിടുന്നു. പൂര്ണമായും സജീകരിച്ച ലാബില് ബയോകെമിക്കല് ഓക്സിജന് ഡിമാന്ഡ് (ബിഒഡി) അളക്കുവാന് ഉപയോഗിക്കുന്ന ഇന്ക്യുബേറ്റര് സ്ഥാപിച്ചിട്ടുണ്ട്. കെമിക്കല് ഓക്സിജന് ഡിമാന്ഡ് (സിഒഡി) മെഷീനും ഇവിടെയുണ്ട്. ഒരു ലാബ് കെമിസ്റ്റ്, മൂന്ന് ഓപ്പറേറ്റര്മാര്, ഒരു മെയിന്റനന്സ് എന്ജിനീയര്, രണ്ട് ടെക്നിക്കല് വിദഗ്ധര് എന്നിവരുടെ നേതൃത്വത്തിലാണ് പ്ലാന്റ് പ്രവര്ത്തിക്കുന്നത്
