കൊച്ചി: റൗണ്ട് ടേബ്ള് ഇന്ത്യയുടെ ‘ഫ്രീഡം ത്രൂ എഡ്യുക്കേഷന്’ പരിപാടിയുടെ ഭാഗമായി കൊച്ചിന് ബാക്ക് വാട്ടര് റൗണ്ട് ടേബ്ള് 131ന്റെ (സിബിആര്ടി 131) ആഭിമുഖ്യത്തില് കൊച്ചിയിലെ വിവിധ സ്കൂളുകളില് ചിത്രരചന മത്സരം, പുസ്തകങ്ങളുടേയും ഉപകരണങ്ങളുടേയും വിതരണം, സ്കോളര്ഷിപ്പ് വിതരണം തുടങ്ങി വിവിധ പരിപാടികള് സംഘടിപ്പിച്ചു. കളമശ്ശേരിയിലെ സാന്ത്വനം അനാഥമന്ദിരത്തില് അവശ്യസാധനങ്ങളുടെ വിതരണം സിബിആര്ടി 131 ചെയര്മാന് അലക്സ് കെ. ബാബു നിര്വഹിച്ചു. ഇടപ്പള്ളി ഹൈസ്കൂളിലെയും പൊറ്റക്കുഴിയിലെ തെരേസ സ്പിന്നെല്ലി പബ്ലിക് സ്കൂളിലെയും ലൈബ്രറിയിലേക്ക് സംഘടന 200 പുസ്തകങ്ങള് കൈമാറി. ഇടപ്പള്ളി ഹൈസ്കൂളില് കഴിഞ്ഞവര്ഷം സിബിആര്ടി 131 ആണ് ലൈബ്രറി മന്ദിരം നിര്മിച്ചുനല്കിയത്. കൊച്ചങ്ങാടിയിലെ ഭിന്നശേഷിയുള്ള കുട്ടികള്ക്കായുള്ള രക്ഷാ സ്കൂളിലാണ് ചിത്രരചന മത്സരം സംഘടിപ്പിച്ചത്.
കൂടാതെ സൗത്ത് ചിറ്റൂര് എല്പി സ്കൂളിലും തെരേസ സ്പിന്നല്ലി സ്കൂളിലും അര്ഹരായ 35 വിദ്യാര്ഥികള്ക്ക് സ്കോളര്ഷിപ്പ് വിതരണവും നടന്നു. റൗണ്ട് ടേബ്ള് നല്കുന്നത് വെറും സംഭാവനയല്ലെന്നും ഭാവിയിലേക്കൊരു നിക്ഷേപമാണെന്നും സിബിആര്ടി 131 ചെയര്മാന് അലക്സ് കെ. ബാബു പറഞ്ഞു. 40 വയസ്സില് താഴെ പ്രായമുള്ള റൗണ്ട് ടേബ്ള് അംഗങ്ങള് വ്യക്തിപരമായ താല്പ്പര്യമെടുത്താണ് സംഘടനയുടെ പ്രവര്ത്തനങ്ങളില് പങ്കാളികളാകുന്നതെന്നും അലക്സ് പറഞ്ഞു.
