ഇരിട്ടി: തന്തോട് ചോംകുന്ന് ശിവക്ഷേത്രത്തില് 20 മുതല് 27വരെ ശ്രീമദ് ഭാഗവത സപ്താഹ യജ്ഞം നടത്താന് തീരുമാനിച്ചിരിക്കുന്നതായി ഭാരവാഹികള് പത്രസമ്മേളനത്തില് അറിയിച്ചു. ഇതിന്റെ ഭാഗമായി 20ന് വൈകുന്നേരം വിഗ്രഹ ഘോഷയാത്ര, കലവറ നിറക്കല് ഘോഷയാത്ര, യജഞാചാര്യസ്വീകരണം എന്നിവ നടക്കും. വൈകുന്നേരം 4 മണിക്ക് ചടച്ചിക്കുണ്ടം അയ്യപ്പ മഠത്തില് നിന്നും പുറപ്പെടുന്ന ഘോഷയാത്ര മാവുള്ളകരി, പെരുമ്പറമ്പ് സ്കൂള് പരിസരം എന്നിവിടങ്ങളില് വിവിധ മാതൃസമിതികള് നയിക്കുന്ന ഘോഷയാത്രകളുമായി സംഗമിച്ച് തന്തോട് ജംഗ്ഷനില് വെച്ച് ക്ഷേത്രം തന്ത്രി ബ്രഹ്മശ്രീ ഇടവലത്ത് പുടയൂര് കുബേരന് നമ്പൂതിരിപ്പാടിന്റെ സാനിധ്യത്തില് യജഞാചാര്യന് ബ്രഹ്മശ്രീ വാച്ചവാദ്ധ്യാര് സുബ്രഹ്മണ്യന് നമ്പൂതിരിയെ സ്വീകരിച്ചു ക്ഷേത്രത്തിലേക്ക് ആനയിക്കും. സപ്താഹ ദിവസങ്ങളില് എല്ലാ ദിവസവും ക്ഷേത്രത്തില് അന്നദാനവും നടക്കും.
പത്രസമ്മേളനത്തില് ക്ഷേത്രം ഭാരവാഹികളായ സി.രഞ്ജിത്ത്, വി.എം.പ്രവീണ്, കെ.നവനീത്, കെ.അരുണ് തുടങ്ങിയവര് പങ്കെടുത്തു.
