കരുനാഗപ്പള്ളി: തെക്കന്കേരളത്തിലെ ക്ഷേത്രോത്സവങ്ങള്ക്ക് തുടക്കം കുറിച്ചുകൊണ്ട് പ്രസിദ്ധമായ ഓച്ചിറ പന്ത്രണ്ടുവിളക്ക് മഹോത്സവത്തിന് ഇന്ന് തിരിതെളിയും. വൃശ്ചികം ഒന്നു മുതല് 12വരെ പരബ്രഹ്മ സവിധത്തില് തയ്യാറാക്കിയ ഭജന കുടിലില് വ്രതശുദ്ധിയോടെ ഭജനം പാര്ക്കാന് ആയിരകണക്കിന് ഭക്തജനങ്ങളാണ് നാടിന്റെ നാനാഭാഗത്തു നിന്നും കാലാകാലങ്ങളായി ഓച്ചിറ പടനിലത്ത് എത്തിക്കൊണ്ടിരിക്കുന്നത്. പണ്ഡിതനെന്നോ, പാമരനെന്നോ ഭേദമില്ലാതെ നാടും, വീടും, ബന്ധുമിത്രാദികളെയും സുഖദുഃഖങ്ങളും എല്ലാം പരബ്രഹ്മത്തില് സമര്പ്പിച്ച് ഈശ്വരചിന്തയില് മാത്രം കഴിയുന്ന 12 ദിനങ്ങളാണ് ഇനിയുള്ളത്.’ഭജനം പാര്ക്കാനുള്ള തയ്യാറെടുപ്പുകളുമായി തിങ്കളാഴ്ച മുതല് തന്നെ ഭക്തജനങ്ങള് ക്ഷേത്രത്തില് എത്തി നടപ്പന്തല്, ആല്ത്തറകള് പരബ്രഹ്മ ആഡിറ്റോറിയം എന്നിവിടങ്ങളില് ഇടംപിടിച്ചു കഴിഞ്ഞു.
വൃശ്ചിക ഉത്സവത്തിന്റെ വിജയകരമായ നടത്തിപ്പുമായി ബന്ധപ്പെട്ട് വിപുലമായ പരിപാടികളാണ് ക്ഷേത്രഭരണസമിതി തയ്യാറാക്കിയിരിക്കുന്നത്. ഭജനം പാര്ക്കാനായി ആയിരം കുടിലുകളാണ് ഒരുക്കിയിരിക്കുന്നത്. കൂടാതെ ഓംകാര സത്രം, പഴയ സത്രം, ഗസ്റ്റ് ഹൗസ് എന്നിവിടങ്ങളിലായി 200 മുറികളും ഒരുക്കിയിട്ടുണ്ട്. ഭക്തജനങ്ങളുടെ പ്രാഥമികആവശ്യങ്ങള്ക്കായി 200 കക്കൂസുകളും, കുളിമുറികളും സജ്ജമാക്കി. എല്ലായിടത്തും 24 മണിക്കൂറും വെള്ളം എത്തിക്കുന്നതിന് വാട്ടര് അതോറിറ്റിയുമായി സഹകരിച്ച് 110 വാട്ടര് ടാപ്പുകള് സജ്ജമാക്കി. അടിയന്തിര ചികിത്സാസഹായത്തിനായി പരബ്രഹമ ഹോസ്പിറ്റലിന്റെ നേതൃത്വത്തില് ആംബുലന്സ് സര്വീസ് ഉടപ്പെടെയുള്ള സൗകര്യങ്ങളും ആരോഗ്യവകുപ്പിന്റെ കീഴില് അലോപ്പതി, ആയുര്വേദ ഹോമിയോപ്പതി വിഭാഗങ്ങളുടെ സേവനവും പടനിലത്ത് ഉണ്ടാകും. കെഎസ്ആര്ടിസി കായംകുളം, കരുനാഗപ്പള്ളി ഡിപ്പോകളില് നിന്നും 45 സ്പെഷ്യല് സര്വ്വീസുകള് ഉണ്ടായിരിക്കും. ക്രമസമാധാന പാലനത്തിനായി കരുനാഗപ്പള്ളി എസിപിയുടെ നേതൃത്വത്തില് 500 പോലീസുകാരും, ഫയര്ഫോഴ്സിന്റെ യൂണിറ്റും, എക്സെസ് യൂണിറ്റും പടനിലത്ത് പ്രവര്ത്തിക്കും. പതിനായിരങ്ങള് നിത്യേന വന്നുപോകുന്ന പടനിലത്ത് നിരവധി കടകളും, വിവിധ തരം കാര്ണിവല് ഷോകളും തുടങ്ങിക്കഴിഞ്ഞു. കൂടാതെ നിത്യേന നടക്കുന വിവിധ സമ്മേളനങ്ങളില് രാഷ്ട്രീയ, സാംസ്കാരിക നേതാക്കന്മാരും, ആത്മീയാചാര്യന്മാരും പങ്കെടുക്കും. നിത്യേന നിരവധി കലാപരിപാടികളുമുണ്ട്. പടനിലത്ത് ജന്മഭൂമി സ്റ്റാളിന്റെ ഉദ്ഘാടനം ഇന്നു വൈകിട്ട് 4.30ന് നടക്കും.
