കുറ്റിപ്പുറം: മൂന്ന് കേസുകളില്പ്പെട്ട് മുങ്ങിനടന്നിരുന്ന പ്രതിയെ അറസ്റ്റ് ചെയ്യാനെത്തിയ പോലീസിന് നേരെ ആക്രമണം. നാല് പോലീസുകാര്ക്ക് സാരമായി പരിക്കേറ്റു.
ചുങ്കത്ത് വീട്ടില് മൊയ്തീന്കുട്ടിയുടെ മകന് മുഹമ്മദ് ഷാജിയെ അറസ്റ്റ് ചെയ്യാനെത്തിയ സംഘത്തിന് നേരെയാണ് ആക്രമണം നടന്നത്. കുറ്റിപ്പുറം സ്റ്റേഷനില് ഷാജിക്കെതിരെ മൂന്ന് കേസുകള് നിലവിലുണ്ട്. തൃത്താല പടിഞ്ഞാറങ്ങാടിയില് ഇയാള് എത്തിയിട്ടുണ്ടെന്നുള്ള രഹസ്യവിവരത്തെ തുടര്ന്ന് കഴിഞ്ഞ ദിവസം രാത്രി കുറ്റിപ്പുറം എസ്ഐ പ്രദീപ് കുമാര്, കോണ്സ്റ്റബിള്മാരായ ശ്യാം, ഹരീഷ്, ജോണ് ബോസ്കോ, ശരത് എന്നിവര് സ്ഥലത്തെത്തി. പിടിവീഴുമെന്നായപ്പോള് ഷാജിയും കൂട്ടരും പോലീസുകാരെ മര്ദ്ദിക്കുകയായിരുന്നു. പിന്നീട് കുറ്റിപ്പുറം സ്റ്റേഷനിലേയും തൃത്താല സ്റ്റേഷനിലേയും കൂടുതല് പോലീസ് എത്തിയാണ് ഇയാളെ അറസ്റ്റ് ചെയ്തത്. പരിക്കേറ്റ പോലീസുകാരെ എടപ്പാളിലെ സ്വകാര്യ ആശുപത്രിയില് പ്രവേശിപ്പിച്ചു. ഔദ്യോഗിക കൃത്യനിര്വണം തടസ്സപ്പെടുത്തിയതിനും, ദേഹോപദ്രവം ചെയ്തതിനും കണ്ടാലറിയുന്ന മുപ്പത് പേര്ക്കെതിരെ കേസ്സെടുത്തിട്ടുണ്ട്.
