മുക്കം: 500, 1000 നോട്ടുകള് സര്ക്കാര്പിന്വലിച്ച സാഹചര്യത്തില് ജനങ്ങള് ബാങ്കുകളെയാണ് ആശ്രയിച്ചതെങ്കില് ബാങ്കുകള് നേരത്തെ പ്രവര്ത്തനം നിര്ത്തിയത് ജനങ്ങളെ ദുരിതത്തിലാക്കി. ജനങ്ങള്ക്ക് ബുദ്ധിമുട്ട് സൃഷ്ടിക്കാതിരിക്കാനായി ശനി, ഞായര് ദിവസങ്ങളിള് പ്രവര്ത്തിക്കണമെന്നും മറ്റ് പ്രവൃത്തി ദിവസങ്ങളില് ആറ് മണി വരെ പ്രവര്ത്തിക്കണമെന്നും റിസര്വ് ബാങ്ക് നിര്ദേശമുളളപ്പോഴാണ് മുക്കത്ത് കനറാ ബാങ്ക്, ഫെഡറല് ബാങ്ക് എന്നിവ നാല് മണിയോടെ പ്രവര്ത്തനം നിര്ത്തിയത്. ജീവനക്കാരുടെ ഈ പ്രവര്ത്തി ജനങ്ങള്ക്ക് ഇരുട്ടടിയായി. ഈ സമയം നൂറ് കണക്കിന് ആളുകളാണ് ബാങ്കില് ഉണ്ടായിരുന്നത്. എന്നാല് പണം തീര്ന്നെന്ന് പറഞ്ഞ് ബാങ്കധികൃതര് പ്രവര്ത്തനം നിര്ത്തുകയായിരുന്നു. ഇതോടെ ഇടപാടുകാര് പ്രതിഷേധിച്ചങ്കിലും അധികൃതര് വഴങ്ങിയില്ല.
നാട്ടുകാര് മാധ്യമ പ്രവര്ത്തകരെ വിവരമറിയിച്ചതോടെ മാധ്യമ പ്രവര്ത്തകരും സ്ഥലത്തെത്തി. ഇതോടെ അവിടെയുണ്ടായിരുന്നവര്ക്ക് ടോക്കണ് നല്കി ആറ് മണി വരെ ഇടപാട് നടത്താന് ബാങ്ക് അധികൃതര് തീരുമാനിച്ചു. സ്ത്രീകളും വൃദ്ധരും ഭിന്നശേഷിക്കാരും ഉള്പ്പെടെയുള്ളവര് മണിക്കൂറുകള് കാത്ത് നിന്നപ്പോഴാണ് തങ്ങള്ക്കിതൊന്നും ബാധകമല്ലന്ന തരത്തില് ബാങ്കധികൃതര് പെരുമാറിയത്. അതിനിടെ തിക്കിലും തിരക്കിലും പെട്ട് മുക്കം എസ്.ബി.ഐ. ശാഖയുടെ ഗ്ലാസ് തകര്ന്നു.
