കോട്ടയം: സന്നദ്ധ രക്തദാനം പ്രോത്സാഹിപ്പിക്കുന്നതിനായി കേരളാ സ്റ്റേറ്റ് എയ്ഡ്സ് കണ്ട്രോള് സൊസൈറ്റിയുടെയും കേരളാ സ്റ്റേറ്റ് ബ്ലഡ് ട്രാന്സ്ഫ്യൂഷന് കൗണ്സിലിന്റേയും ആഭിമുഖ്യത്തില് തിരുവനന്തപുരത്തു നിന്നും ആരംഭിച്ച ബ്ലഡ് മൊബൈല് ഇന്നു മുതല് 12 വരെ കോട്ടയത്ത് പര്യടനം നടത്തും.
ഇതിന്റെ ഭാഗമായി ആരോഗ്യവകുപ്പിന്റെയും പാലാ ബ്ലഡ് ഫോറത്തിന്റെയും നേതൃത്വത്തില് വിവിധ സംഘടനകളുടെയും എച്ച്ഡിഎഫ്സി ബാങ്കിന്റെയും വിവിധ ഹയര് സെക്കണ്ടറി സ്കൂള്, എന്എസ്എസ് യൂണിറ്റുകളുടേയും സഹകരണത്തോടെ ജില്ലയുടെ വിവിധ ഭാഗങ്ങളില് സന്നദ്ധ രക്തദാന ക്യാമ്പ് നടത്തും.
7ന് കൊഴുവനാല്, 8ന് പാല, 9ന് പൂഞ്ഞാര്, 10ന് വാകത്താനം, 11ന് എസ്എച്ച് മൗണ്ട് കോട്ടയം, 12ന് കിടങ്ങൂര് എന്നിവിടങ്ങളിലാണ് രക്തദാന ക്യാമ്പുകള് നടക്കുന്നത്. ജില്ലാതല പര്യടനത്തിന്റെ ഉദ്ഘാടനം 7ന് രാവിലെ 9.30 ന് കൊഴുവനാലില് അഡ്വ. ജോയി അബ്രഹാം എം.പി നിര്വ്വഹിക്കും. തുടര്ന്ന് വിവിധ സ്ഥലങ്ങളില് പാലാ രൂപതാ സഹായമെത്രാന് മാര് ജേക്കബ് മുരിക്കന്, പി.സി ജോര്ജ്ജ് എംഎല്എ, മോന്സ് ജോസഫ് എംഎല്എ, ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പ്, ജില്ലാ മെഡിക്കല് ഓഫീസര് ജേക്കബ്ബ് വര്ഗ്ഗീസ് എന്നിവരുടെ നേതൃത്വത്തില് മൊബൈല് ബ്ലഡിന് സ്വീകരണം നല്കും.
ഒരേ സമയം നാല് പേരുടെ രക്തം സ്വീകരിക്കാനും രക്തം ദാനം ചെയ്യുന്നവരെ പരിശോധിക്കാനും രക്തം എടുത്തു കഴിഞ്ഞവര്ക്ക് വിശ്രമിക്കാനും രക്തം സൂക്ഷിക്കാനും സൗകര്യമുളളതാണ് ബ്ലഡ് മൊബൈല്. ലയണ്സ് ക്ലബ് ഇന്റര് നാഷണല് ഡിസ്ട്രിക്ട് 318 ബിയുടെ പുതിയബ്ലഡ് മൊബൈലും പര്യടനത്തില് പങ്കു ചേരും.
